راولپنڈی، بانی پی ٹی آئی و سابق وزیراعظم عمران خان کا کہنا ہے کہ اسٹیبلشمنٹ اور تحریک انصاف کی ضرورت ملک اور عوام کو ہے۔
یہ بات ایڈووکیٹ فیصل چوہدری نے عمران خان سے اڈیالہ جیل میں ملاقات کے بعد میڈیا سے گفتگو کرتے ہوئے بتائی ہے۔
فیصل چوہدری ایڈووکیٹ نے بتایا کہ دوران ملاقات عمران خان نے کہا کہ 26ویں ترمیم کے بعد جو ہو رہا ہے اس پر لیگل کمیٹی، پارٹی قیادت چیف جسٹس کو خط لکھے گی، عدالت میں ہمارے کیسسز نہیں لگ رہے، بشری بی بی کے ساتھ زیادتی ہو رہی ہے۔
سابق وزیراعظم نے کہا کہ اسٹیبلشمنٹ اور پی ٹی آئی کی ضرورت ملک اور عوام کو ہے، پی ٹی آئی فیڈریشن کی جماعت جو پاکستان کو اکھٹا کرسکتی ہے۔
مائنز اینڈ منرلز پر عمران خان نے کہا کہ وزیر اعلی کے پی اور سینئر لیڈر شپ آکر مجھے بریف کرے، بانی نے کہا کہ مائنز اینڈ منرلز بل متنازع ہو چکا ہے، لہذا ضروری ہے کہ لوگوں کو اعتماد میں لیں، متنازع معاملات گڑ بڑ ہوں گے، افغانستان سے متعلق بانی پی ٹی آئی نے کہا کہ انہوں نے 3 سال لگا دیئے، ہم نے پہلے کہا تھا کہ دہشتگردی کے خاتمے کے لئے افغانستان سے بات چیت کرکے انہیں اسمیں شامل کرنا پڑے گا۔
سابق وزیراعظم کا کہنا ہے کہ حکومت نے وقت کا ضیاع کیا جس سے قیمتی جانوں کا ضیاع ہوا، فوج کے جوان شہید ہوئے، ان چیزوں کو مدنظر نہیں رکھا گیا، اس وقت بھی فارن ڈائریکٹ انویسٹمنٹ نہیں آرہی،عمران خان نے کہا کہ زرمبادلہ کے بغیر ملک میں ترقی نہیں ہو سکتی، انویسٹمنٹ تبھی آئے گی جب ملک میں قانون کی حکمرانی ہو گی۔
بانی پی ٹی آئی نے کہا کہ تحریک انصاف کو تتر بتر کرنے کیلئے پاکستان کو بنانا ریپبلک بنا دیا گیا، چاہے عدلیہ ہو، ایف آئی اے یا پولیس ہر ادارے کو تباہ کر دیا گیا۔
