لاہور، وزیراعلیٰ پنجاب مریم نواز شریف سے پرتگال کے سفیر ایچ ای مسٹر مینوئل فریڈریکو پنہیرو ڈا سلوا کی جانب سے ملاقات کی گئی۔
ملاقات کے دوران پنجاب میں بیرونی سرمایہ کاروں کے لئے مراعاتی پیکیج ری ڈیزائن کرنے کا فیصلہ کیا جبکہ باہمی تعلقات کے فروغ اور تجارتی حجم بڑھانے کے لئے دو طرفہ ٹیمیں تشکیل دینے پر بھی اتفاق کیا گیا ہے۔
حکومت پنجاب کی جانب سے مختلف شعبوں میں پرتگال کے تجربات اور مشاہدات سے استفادہ حاصل کرنے کا فیصلہ کیا گیا جبکہ وزیراعلیٰ مریم نواز کی جانب سے حکام سے باہمی تعلقات کے فروغ کے لئے پائیدار اور مؤثر پلان طلب کر لیا گیا، ملاقات میں تعلیم، صحت، آئی ٹی، زراعت اور ٹورازم کے فروغ پر تبادلہ خیال کیا گیا۔
اس موقع پر گفتگو کے دوران وزیراعلیٰ مریم نواز کا کہنا تھا کہ پرتگال کیساتھ سفارتی تعلقات کو قدر کی نگاہ سے دیکھتے ہیں، باہمی تعلقات کو مزید مربوط کریں گے۔
پرتگال کے اعزازی قونصل افتخار فیروز، چیف سیکرٹری زاہد اختر زمان، ایڈیشنل سیکرٹری سارہ حیات اور دیگر بھی ملاقات میں موجود تھے۔
دوسری جانب حمزہ شہباز کا کہنا تھا کہ فلسطینیوں کی نسل کشی پر دنیا کی بے حسی افسوسناک ہے۔
سابق وزیراعلیٰ پنجاب اور نائب صدر مسلم لیگ (ن) حمزہ شہباز کا کہنا تھا کہ فلسطینیوں کی نسل کشی پر دنیا کی بے حسی ایک سنگین انسانی المیہ ہے۔
یوم یکجہتی فلسطین کے موقع پر اپنے ایک پیغام میں سابق وزیراعلیٰ حمزہ شہباز نے کہا کہ غزہ پر صیہونی ریاست کی بربریت کو 1 سال مکمل ہو گیا ہے، 41 ہزار سے زائد افراد شہید ہوگئے ہیں۔
