سابق وفاقی وزیر اور سینیٹر فیصل واوڈا کا کہنا ہے کہ بانی پی ٹی آئی عمران خان کے لیے جیل ہی فائدے میں ہے۔
سینیٹر فیصل واوڈا کا نجی ٹی وی کے پروگرام میں بات چیت کرتے ہوئے یہ کہنا تھا بانی پی ٹی آئی جیل سے باہر آئے تو ان کی کہانی ختم ہو جائے گی۔
فیصل واوڈا کا یہ کہنا تھا سابق وزیراعظم کا جیل میں رہنا ہی ان کے فائدے میں ہے، جیل توڑنے کی بات کرنے والے ان کی زندگی کی ضمانت کیسے دیں گے؟
ایک سوال کے جواب میں سینیٹر فیصل واوڈا نے کہا کہ مراد سعید وہ طوطا ہے جس میں 2 بندوں کی جان ہے، مراد سعید رو پوش کیوں ہے؟ وہ سامنے کیوں نہیں آتا۔
سینیٹر کا کہنا تھا کہ سابق ڈی جی آئی ایس آئی لیفٹیننٹ جنرل (ر) فیض حمید سارا ملبا سابق وزیراعظم پر ڈالیں گے، فیض حمید اور علی امین گنڈاپور کی باہمی گفتگو سامنے آ چکی ہے، گنڈا پور کے خلاف مقدمے کا اندراج ہوچکا ہے، اسکے خلاف کارروائی ہونی چاہیے۔
فیصل واوڈا نے کہا کہ علی امین گنڈاپور نے پہلے کہا کہ کسی کا باپ عمران خان کو گرفتار نہیں کر سکتا، اب وہی کہہ رہے ہیں کہ کسی کا باپ بھی ان کا ملٹری ٹرائل نہیں کر سکتا۔
