راولپنڈی، سربراہ عوام پاکستان پارٹی اور سابق وزیراعظم شاہد خاقان عباسی کا کہنا ہے کہ قومی و صوبائی اسمبلیوں میں بیٹھے لوگوں کی اکثریت الیکٹ ہو کر نہیں آئی۔
سابق رکن صوبائی اسمبلی سرفراز افضل کی عوام پاکستان پارٹی میں شمولیت کی تقریب سے خطاب کرتے ہوئے سابق وزیراعظم شاہد خاقان عباسی نے کہا کہ سیاسی ورکر کے لیے سب سے مشکل کام اپنی پارٹی کو چھوڑنا ہوتا ہے، ہم جب ووٹ کو عزت دو کی بات کرتے تھے تو اس وقت ہمیں یہی تھا کہ ملک آئین کے مطابق چلے گا۔
سابق وزیراعظم کا کہنا تھا کہ آج سے 2 ہفتے پہلے اس ملک کی قومی اسمبلی اور سینیٹ میں کابینہ پورا دن آئینی ترمیم کے لیے بیٹھی رہی، ان میں سے کسی نے آئینی ترمیم دیکھی تک نہیں تھی، یہ رات کے اندھیرے میں آئینی ترمیم کو پاس کرنا چاہتے تھے۔
شاہد خاقان عباسی نے کہا کہ جب ملکی سیاست کی یہ حالت ہوگی تو ملک کیسے ترقی کرے گا، پھر نوجوان کو روزگار کیسے ملے گا، لوگوں کے معاشی حالات کیسے بہتر ہوں گے۔
دوسری جانب نجی ٹی وی چینل سے گفتگو کے دوران علی محمد خان نے کہا کہ سیاسی تحریک میں تیزی آرہی ہے، ہم نے پارلیمنٹ میں بھی آواز اٹھائی، جب کوئی جماعت یہ کہے اپنے لیڈر کو باہر نکالیں گے، تو اسکا مطلب بندوق سے نہیں ہوتا۔
رہنما پی ٹی آئی کا کہنا تھا کہ ہم عمران خان کو اگر جیل سے نکالیں گے تو مزید مسائل پیدا ہوں گے، ہم بانی پی ٹی آئی کوعدالت کے ذریعے رہا کروائیں گے، 8 فروری کو قوم نے سابق وزیراعظم کو ووٹ دیا۔
