اسلام آباد، سابق وفاقی وزیر اور سینیٹر فیصل واوڈا کی جانب سے حکومت کو نااہل اور نکما قرار دے دیا گیا ہے۔
اسلام آباد میں میڈیا سے غیر رسمی گفتگو کے دوران سینیٹر فیصل واوڈا کی جانب سے حکومت کی کارکردگی پر تنقید کرتے ہوئے یہ کہا گیا کہ 2 دن کی ہلچل کے باوجود آئینی ترمیم نہ ہونا حکومت کی کارکردگی پر سوالیہ نشان ہے۔
صحافی کے آئینی ترمیم میں ناکامی کے متعلق سوال کا جواب دیتے ہوئے سینیٹر فیصل واوڈا کا یہ کہنا تھا کہ نااہل اور نکموں سے یہی توقع کی جاسکتی ہے، حکومتی اراکین چھپ چھپا کر نکل رہے ہیں، حکومتی اراکین سے پوچھیں کہ بل کیوں نہیں پیش کیا گیا۔
فیصل واوڈا کا کہنا تھا کہ سیاست کے چیمپئن آج کل سامنے آ رہے ہیں، آپ پوچھ لیں کہ انہوں نے کیا کیا ہے؟
سینیٹر کا کہنا تھا کہ اپنا تجزیہ اور پیش گوئی جلد دوں گا، بتائیں گے انشااللہ لیکن گورنمنٹ کے لوگ نکلنے والے ہیں۔
یاد رہے کہ 2 روز سے حکومت، کابینہ اور پارلیمنٹ سے آئینی پیکج منظور کروانے کی کوششوں میں مصروف ہے، جبکہ اپوزیشن اس فیصلے سے نالاں ہے۔
اس سلسلے میں حکومتی اور اپوزیشن وفد نے مولانا فضل الرحمن سے بھی ملاقاتیں کی تاہم ابھی آئینی ترمیم کو پارلیمنٹ میں پیش نہیں کیا جاسکا ہے۔
