لاہور، وزیر اعلیٰ پنجاب مریم نواز کا کہنا تھا کہ فلسطین کے مظلوم عوام کی حالت پر دنیا انسانیت کی خاموشی ایک المیہ ہے۔
یوم اظہار یکجہتی فلسطین پر پیغام جاری کرتے ہوئے وزیراعلیٰ پنجاب مریم نواز کا کہنا تھا کہ فلسطین کا مسئلہ صرف فلسطینیوں کا نہیں بلکہ پوری دنیا کا مسئلہ ہے، فلسطینی عوام اپنے حقوق کے تحفظ کی جنگ لڑ رہی ہے۔
مریم نواز کا کہنا تھا کہ پاکستان ہمیشہ سے فلسطین کے موقف کی مکمل حمایت کرتا آیا ہے اور کرتا رہے گا، ن لیگ نے ہر پلیٹ فارم پر اسرائیلی جارحیت کے خلاف توانا آواز اٹھائی ہے، وزیر اعظم پاکستان نے فلسطین اور مسئلہ کشمیر کے حل کا روڈ میپ جاندار انداز میں پیش کیا۔
وزیراعلیٰ پنجاب کا کہنا تھا کہ حکومت پاکستان فلسطینیوں کیساتھ کھڑے ہیں، جب تک اس کا منصفانہ حل فلسطینی عوام کی امنگوں کے مطابق نہیں نکلتا، پوری دنیا میں امن قائم نہیں ہوسکے گا۔
مریم نواز نے اپنے بیان میں کہا کہ دنیا اور انسانی حقوق کی تنظیموں کو چاہیے کہ فلسطینی مظلوم عوام کی مدد کے لیے آگے بڑھیں اور انکے حقوق کا تحفظ کرے۔
