اسلام آباد، وزیر دفاع خواجہ آصف کا کہنا ہے کہ سابق وزیراعظم عمران خان نے جو بیج بوئے ہیں اس کے نتائج بہت خطرناک ہوں گے۔
قومی اسمبلی میں اظہار خیال کرتے ہوئے وزیر دفاع خواجہ آصف نے کہا کہ جلسے میں جو گفتگو کی گئی وہ علیحدگی پسندوں کی زبان ہے، سابق وزیراعظم کے پی میں علیحدگی کی تحریک چلانے کی آپشن رکھنا چاہتے ہیں۔
وزیر دفاع نے کہا کہ عمران خان خیبر پختونخوا میں نفرتوں کی آگ بھڑکا رہے ہیں، جو ماحول عمران خان نے بنا دیا ہے اس کے بعد میثاق پارلیمان کمیٹی کا کوئی جواز نہیں، یہ جس راستے پر چل نکلے ہیں اس پر واپسی کا کوئی راستہ باقی نہیں رہ گیا۔
خواجہ آصف کا کہنا تھا کہ پتہ نہیں جنرل (ر) فیض حمید اندر عمران خان کے بارے میں کون سے گانے گا رہے ہیں، اسٹیبلشمنٹ نے جلسہ ملتوی کرنے کا پیغام دیا تھا تو اتنی تابعداری کیوں؟ گالیاں بھی دیتے ہیں اور مذاکرات کی باتیں بھی کرتے ہیں۔
وزیر دفاع کا یہ کہنا تھا کہ وزیراعلیٰ کے پی، علی امین گنڈا پور کے ذریعے ڈبل گیم کھیلی جا رہی ہے، اگر کوئی کرپشن کے ثبوت دے اس پر الزام لگایا جاتا ہے، خواہشوں پر کوئی پابندی نہیں جو مرضی کہیں، یہ تصدیق کروائیں کہ انہوں نے ٹویٹ کیا انکی طرف سے کیا گیا۔
دوسری جانب میڈیا سے گفتگو کے دوران سابق وزیراعظم و چیئرمین سینیٹ یوسف رضا گیلانی کا کہنا تھا کہ گورنرراج کے حق میں نہیں، نمبرز پورے ہوں گے تو ترمیمی بل منظور ہوگا۔
سابق وزیراعظم پاکستان کا کہنا تھا کہ جن لوگوں نے میرے او پر کیس بنایا آج 2 ووٹ یہاں پر موجود ہیں اگر ہم جائیں گے تو وہ پاس ہوجائے گا، ہم نے دل بڑا رکھا ہوا ہے اور آج ہم ان کو ووٹ دینے جارہے ہیں، ہم ذاتیات سے ہٹ کر ملک کر سوچنا ہے۔
چیئرمین سینیٹ کا کہنا تھا کہ سربراہ جو یو آئی (ف) مولانا فضل الرحمن کا بہت احترام کرتا ہوں، ہمارے ساتھ انہوں نے بہت کام کیا، مولانا فضل الرحمان کیساتھ میرے بہت اچھے تعلقات ہیں انکے بارے میں کوئی کمنٹس نہیں کروں گا۔
