اسلام آباد، وفاقی وزیر منصوبہ بندی احسن اقبال کا کہنا ہے کہ عمران خان عدالتوں میں بے گناہی ثابت کریں، انہیں این آر او نہیں ملے گا۔
قومی اسمبلی اجلاس کے دوران اظہار خیال کرتے ہوئے وفاقی وزیر احسن اقبال کا کہنا تھا کہ عمران خان کو جیل میں فائیو سٹار سہولیات ملی ہوئی ہیں، کبھی یہ سٹریچر پر چیخیں مارتے ہیں تو کبھی کہیں، کیا کبھی کسی نے رانا ثنااللہ، خواجہ آصف اور احسن اقبال کی چیخیں سنی تھیں، ہم نے بہادری کے ساتھ مقابلہ کیا ہے، ان کی چیخیں آپ کو روزانہ سنائی دیتی ہیں۔
وفاقی وزیر احسن اقبال کا یہ کہنا تھا کہ سچ سننے کا حوصلہ پیدا کریں، آج ان کے ساتھ جو کچھ ہورہا ہے کسی کا کیا ہوا نہیں، پی ٹی آئی نے جو قبر دوسروں کیلئے کھودی تھی آج خود ان میں گر گئے۔
احسن اقبال کا کہنا تھا کہ ہم نے امریکہ کی کانگریس میں جاکر سینیٹرز کے پاؤں نہیں دبائے تھے، ہم نے پاکستانی عدالتوں میں اپنی بے گناہی ثابت کی تھی۔
وفاقی وزیر کا یہ کہنا تھا کہ بتائیں 190ملین پاؤنڈ کا غبن کس نے کیا، آپ نے تحفے کیوں بیچے؟ آپ دوسروں سے رسیدیں مانگا کرتے تھے، آج آپ کو کہا جارہا ہے رسیدیں دکھائیں تو آپ کی چیخیں نکل رہی ہیں۔
ن لیگی رہنما احسن اقبال کا مزید کہنا تھا کہ اصل میں یہ لوگ این آر او مانگ رہے ہیں کہ ان کا لیڈر کسی طرح باہر نکل آئے، آپ کے لیڈر کو این آر او نہیں ملے گا، عمران خان کو اپنی بے گناہی ثابت کرنا پڑے گی، این آر او کی بھیک نہ مانگیں، این آر او نہیں ملے گا۔
