وزیر دفاع خواجہ آصف کا یہ کہنا تھا کہ وزیراعلیٰ علی امین گنڈاپور خود سابق وزیراعظم عمران خان کی جگہ لینا چاہتے ہیں۔
نجی ٹی وی چینل سے گفتگو کے دوران وزیر دفاع خواجہ آصف کا یہ کہنا تھا کہ علی امین گنڈا پور چار دیواری میں الگ زبان استعمال کرتے ہیں اور اسٹیج پر آکر مولا جٹ بن جاتے ہیں، وزیراعظم پاکستان شہباز شریف سے ملاقات کے دوران تو وہ پوری شوگر مل بنے ہوئے تھے۔
وزیر دفاع کا یہ کہنا تھا کہ پی ٹی آئی کی قیادت خاص طور پر خیبر پختونخوا کے رہنما نہیں چاہتے ہیں کہ سابق وزیراعظم عمران خان جیل سے باہر آئیں۔ یہ سب ایک دوسرے کو استعمال کر رہے ہیں۔
خواجہ آصف کا مزید یہ کہنا تھا کہ علی امین گنڈاپور خود عمران خان کی جگہ لینا چاہتے ہیں، ان کے اسٹیبلشمنٹ سے رابطے ہیں مگر عمران خان سمجھتے ہیں کہ یہ رابطے ان کے کام آئیں گے۔
دوسری جانب وزیراعلیٰ خیبرپختونخوا علی امین گنڈاپور کی مشیر برائے سماجی بہبود مشعال یوسفزئی کو عہدے سے ہٹا دیا گیا۔
وزیر اعلیٰ خیبرپختونخوا کی مشعال یوسفزئی کو ڈی نوٹیفائی کرنے کی سمری پر گورنر خیبرپختونخوا کی جانب سے دستخط کر دیے گئے ہیں۔
گورنر فیصل کریم کنڈی کی جانب سے مشعال یوسفزئی کو بطور مشیر ڈی نوٹیفائی کرنے کی منظوری دے دی گئی ہے۔
