154
کھٹمنڈو، نیپال میں طوفانی بارشوں کے باعث سیلابی ریلوں نے تباہی مچادی جس کے بعد حادثات میں ہلاکتوں کی تعداد 193 تک پہنچ گئی ہے۔
غیر ملکی میڈیا کا کہنا ہے کہ نیپالی دارالحکومت کھٹمنڈو سمیت دیگر شہروں میں طوفانی بارشوں کی وجہ سے سیلابی صورتحال کا سامنا ہے اور اب تک ہونے والے حادثات میں 193 افراد جان کی بازی ہارگئے، 30 افراد ابھی تک لاپتا ہیں ،جن کی تلاش ابھی جاری ہے۔
غیر ملکی میڈیا کے مطابق کھٹمنڈو کے کچھ حصوں میں 300 ملی میٹر سے زائد بارش ریکارڈ کی گئی، بارش کے بعد ہونیوالے حادثات کے بعد صرف کھٹمنڈو میں اب تک 33 اموات ہوئی ہیں۔
ترجمان نیپالی فوج نے ایک بیان میں بتایا کہ اب تک 4 ہزار افراد کو ہیلی کاپٹر اور موٹر کشتیوں کی مدد سے ریسکیو کیا گیا ہے۔
وزیراعظم پاکستان شہباز شریف کی جانب سے بھی گزشتہ روز نیپال میں سیلاب سے جانی نقصان پر اظہار افسوس کرتے ہوئے کہا گیا تھا کہ نیپال کے ساتھ مکمل یکجہتی کیساتھ کھڑے ہیں اور مدد کےلیے تیار ہیں۔
