وفاقی وزیر داخلہ محسن نقوی کی زیر صدارت شنگھائی تعاون تنظیم سربراہی اجلاس کی تیاریوں کے حوالے سے اجلاس ہوا۔
جس میں وفاقی سیکرٹری داخلہ، ایڈیشنل سیکرٹریز، چیف کمشنر، آئی جی پولیس اسلام آباد، ڈپٹی کمشنر، ڈپٹی کمانڈنٹ ایف سی و دیگر نے شرکت کی۔
اجلاس میں سکیورٹی انتظامات کا جائزہ لیا گیا جبکہ سمٹ کے موقع پر فول پروف سکیورٹی انتظامات کو یقینی بنانے کیلئے لائحہ عمل کی منظوری بھی دی گئی۔
اس موقع پر محسن نقوی کا کہنا تھا کہ رواں ماہ ہونے والے شنگھائی تعاون تنظیم کے سربراہی اجلاس میں کئی سربراہان مملکت شرکت کر رہے ہیں۔
اس بین الاقوامی کانفرنس کا پاکستان میں انعقاد پوری قوم کیلئے باعث اعزاز ہے۔
اس موقع پر فول پروف انتظامات کو ہر صورت یقینی بنایا جائے گا، وفاقی دارالحکومت کو خوبصورت بنایا جائے گا۔
ان کا مزید کہنا تھا کہ کانفرنس کے دوران فول پروف سکیورٹی انتظامات کو یقینی بنانے کیلئے پاک فوج، رینجرز، ایف سی اور پنجاب پولیس کی اضافی نفری بھی تعینات کی جائے گی۔
واضح رہے شنگھائی تعاون تنظیم کا سربراہی اجلاس پاکستان میں 15 اور 16 اکتوبر کو ہوگا۔
