لاہور،پاک بھارت کشیدگی کے پیش نظر پنجاب بھر کے تمام تعلیمی ادارے جو بند کیے گئے تھے، کل سے دوبارہ کھول دیے جائیں گے۔
بھارت نے 6 اور 7 مئی کی درمیانی رات کو بزدلانہ حملہ کرتے ہوئے آزاد کشمیر کے علاقوں کوٹلی، مظفر آباد، اور باغ کے علاوہ پنجاب میں مریدکے اور احمد پور شرقیہ کی شہری آبادی کو نشانہ بنایا، اس حملے میں 2 مساجد شہید ہوئیں، جبکہ 2 بچوں سمیت 31 پاکستانی شہید اور 51 زخمی ہوئے۔
کشیدہ صورتحال کے پیش نظر پنجاب بھر کے اسکولوں میں 9 اور 10 مئی کو تدریسی سرگرمیاں معطل کر دی گئی تھیں، لیکن جنگ بندی کے بعد پنجاب میں کل سے تمام اسکولوں میں تدریسی عمل دوبارہ شروع کر دیا جائے گا۔
پنجاب بھر میں 2 دنوں کے لیے اسکول بند رکھنے کا اعلان کیا گیا تھا، اور اس حوالے سے باقاعدہ نوٹیفکیشن بھی جاری کیا گیا ہے جس میں کہا گیا ہے کہ کل سے تعلیمی سرگرمیاں معمول کے مطابق جاری ہوں گی۔
یاد رہے کہ بھارت کی جانب سے پاکستان پر رات کے وقت کیے گئے حملے کے بعد پاکستان نے بھرپور جواب دیا، اور پاکستان کے دفاعی نظام نے بھارتی جارحیت کا منہ توڑ جواب دیتے ہوئے 3 رافیل، ایک مگ 29، ایک ایس یو 30 طیارے اور ایک کومبیٹ ڈرون کو مار گرایا۔
پاکستان نے 10 مئی کی صبح بھارت کی جارحیت پر جوابی کارروائی کی اور آپریشن "بُنْيَان مَّرْصُوْص” (آہنی دیوار) کے دوران بھارت کے 10 سے زائد اہم اہداف کو کامیابی سے نشانہ بنایا، جس میں بھارت کا فضائی دفاعی نظام ایس 400 اور آدم پور، ادھم پور سمیت کئی ائیر فیلڈز بھی تباہ ہو گئے۔
