وزیراعظم کے سیاسی مشیر اور رہنما مسلم لیگ (ن) رانا ثنا اللہ کی جانب سے پشتونخوا ملی عوامی پارٹی کے سربراہ محمود خان اچکزئی سے ملاقات کی تصدیق کر دی گئی ہے۔
نجی ٹی وی چینل سے گفتگو کے دوران رانا ثنا اللہ نے محمود خان اچکزئی سے ملاقات کی تصدیق کی اور کہا کہ انہوں نے محمود خان سے یہ سوال کیا تھا کہ سابق وزیراعظم عمران خان نے آپ کو کیا مینڈیٹ دیا ہے؟ کیونکہ وہ یہ بات کرتے ہیں کہ وہ ہمارے ساتھ بات کرنے کو تیار نہیں۔
وزیراعظم کے سیاسی مشیر نے کہا کہ اچکزئی صاحب کی جانب سے اس بات پر افسوس کا اظہار کیا گیا ہے اور کہا کہ جب تک سب ایک دوسرے کو برداشت کرکے بات نہیں کریں گے تو معاملہ آگے نہیں بڑھ سکتا، رہنما ن لیگ نے بھی ہمیشہ یہی بات کی ہے اور کبھی یہ نہیں کہا کہ تحریک انصاف کو نکال دو۔
علاوہ ازیں 9 مئی پر معافی مانگنے کی شرط سے متعلق سوال پر رہنما مسلم لیگ (ن) نے کہا کہ سیاست میں کچھ باتیں جواب در جواب کہنا لازم ہوجاتی ہیں کیونکہ سابق وزیراعظم عمران خان روز یہ کہتے ہیں کہ میں ان کے ساتھ بات کرنےکو تیار نہیں ہوں۔
وزیراعظم کے سیاسی مشیر کا کہنا تھا کہ شہباز شریف نے وزیراعظم پاکستان بنتے ہی جب سب کو بات چیت کرنے کی پیشکش کی تو اس وقت معافی کی شرط نہیں لگائی تھی۔
