اسلام آباد، وفاقی وزیر داخلہ محسن نقوی کا کہنا ہے کہ دھاوا بولنے کی قیمت ادا کرنا ہوگی، اگر مزید لائن کراس کی گئی تو سخت کارروائی کی جائے گی۔
وفاقی داخلہ محسن نقوی نے میڈیا سے گفتگو کرتے ہوئے یہ کہا کہ دھاوا بولنے کی قیمت ادا کرنا ہوگی، اگر مزید لائن کراس کی گئی تو سخت کارروائی عمل میں لائی جائے گی۔
محسن نقوی کا کہنا تھا کہ تحریک انصاف کے شرپسندوں نے پولیس پر آنسو گیس کے شیل پھینکے، پولیس پر فائرنگ اور آنسو گیس کی شیلنگ سے 80 سے 85 جوان زخمی ہوئے ہیں۔
وفاقی وزیر داخلہ نے کہا کہ پی ٹی آئی کے احتجاج میں افغان باشندے کیسے آئے؟ 48 گھنٹوں میں 120 افغان شہری حراست میں لیے گئے ہیں، پی ٹی آئی کے مظاہرین میں افغان باشندوں کی موجودگی تشویشناک ہے، ایک طرف دھاوا اور ایک طرف مذاکرات نہیں چل سکتے۔
محسن نقوی کا کہنا تھا کہ کسی کی پراپرٹی کو نقصان نہیں پہنچائیں گے لیکن وہ یہ سب کچھ کر رہے ہیں، ان کے پاس ہتھیار ہیں ہمارے جوانوں کے پاس اسلحہ نہیں۔
وفاقی وزیر داخلہ کا کہنا تھا کہ ساری صورتحال کے ذمہ دار علی امین گنڈاپور ہیں، انہیں بہت سمجھانے کی بہت کوشش کی گئی لیکن ان کے عزائم کچھ اور ہیں، علی امین گنڈا پور چاہتے تو بات ہو سکتی تھی۔
