راولپنڈی، شمالی وزیرستان میں پاک فوج اور خوارج کے درمیان فائرنگ کے تبادلے کے نتیجے میں لیفٹیننٹ کرنل سمیت 6 جوان شہید ہوگئے۔
آئی ایس پی آر کا کہنا ہے کہ شمالی وزیرستان کے علاقے سپن وام میں سکیورٹی فورسز اور خوارج کے درمیان فائرنگ کا تبادلہ ہوا جس میں 6 خوارج جہنم واصل ہوگئے۔
آئی ایس پی آر کے مطابق خوارج سے شدید فائرنگ کے تبادلے میں لیفٹیننٹ کرنل محمد علی شوکت سمیت 6 جوان شہید ہوگئے۔
آئی ایس پی آر کا کہنا ہے کہ خوارج کے خلاف 4 اور 5 اکتوبر کی درمیانی شب کارروائی کی گئی اور لیفٹیننٹ کرنل محمد علی شوکت خوارج کے خلاف آپریشن کو باقاعدہ لیڈ کررہے تھے۔
آئی ایس پی آر کا کہنا تھا کہ شہید ہونیوالے دیگر 5 جوانوں میں لانس نائیک محمد اللہ، لانس نائیک اختر زمان، لانس نائیک شاہد اللہ، لانس نائیک یوسف علی اور سپاہی جمیل احمد شامل ہیں۔
آئی ایس پی آر کا کہنا تھا کہ 43 سالہ شہید لیفٹیننٹ کرنل کا تعلق فیصل آباد سے ہے، جبکہ دیگر 5 جوانوں کا تعلق خیبر، لکی مروت، ٹانک، اورکزئی اور سوات سے ہے۔
آئی ایس پی آر کے مطابق سکیورٹی فورسز دہشتگردی کو جڑ سے ختم کرنے کے لیے پرعزم ہیں، ہمارے بہادر سپاہیوں کی قربانیاں ہمارے عزم کو مزید مضبوط کرتی ہیں۔
