لاہور، رہنما مسلم لیگ (ن) خواجہ سعد رفیق کی جانب سے سربراہ بی این پی سردار اختر مینگل کے استعفے کو وفاق کے لیے برا شگون قرار دے دیا گیا ہے۔
سوشل میڈیا پر جاری بیان میں رہنما مسلم لیگ (ن) خواجہ سعد رفیق کا کہنا ہے کہ موجودہ حالات میں اختر مینگل، ڈاکٹر مالک بلوچ، لشکری رئیسانی، عبدالغفور حیدری اور مولانا ہدایت الرحمان جیسے سیاستدانوں کا نام غنیمت سمجھا جانا چاہیے۔
دوسری جانب ن لیگی رہنما طارق فضل چوہدری کا کہنا تھا کہ سردار اختر مینگل کا استعفیٰ فوری طور پر منظور نہیں کیا جائے گا۔
رہنما تحریک انصاف ڈاکٹر نثار احمد جٹ نے کہا کہ سردار اختر مینگل کو استعفے پر نظر ثانی کرنی چاہیے۔
یاد رہے کہ گزشتہ روز بلوچستان نیشنل پارٹی (بی این پی) کے سربراہ اختر مینگل نے قومی اسمبلی کی رکنیت سے استعفیٰ دے دیا تھا۔
اسلام آباد میں پریس کانفرنس کے دوران اختر مینگل کا کہنا تھا کہ میں آج اسمبلی سے مستعفی ہونے کا اعلان کرتا ہوں، یہ بات میں نے کسی کو نہیں بتائی لیکن آج ابھی اس پریس کانفرنس میں بتا رہا ہوں۔
سربراہ بی این پی نے کہا کہ میں اپنے لوگوں کے لیے کچھ نہیں کر سکا، بلوچستان کے موجودہ حالات دیکھتے ہوئے یہ فیصلہ کیا ہے، میں ریاست، صدر اور وزیراعظم پر عدم اعتماد کا اعلان کرتا ہوں، پورے نظام پر عدم اعتماد کر رہا ہوں۔
