190
کوآرڈینیٹر وزیراعظم پاکستان شہباز شریف رانا احسان افضل کا یہ کہنا ہے کہ حکومت کسی صورت تاجروں کے دباؤ میں نہیں آئے گی، ریٹیلیرز کو ہر صورت ٹیکس نیٹ میں آنا پڑے گا۔
یاد رہے کہ اضافی ٹیکسز اور بجلی کے بلوں کے خلاف ملک بھر کے تاجروں نے آج شٹر ڈاؤن ہڑتال کی ہوئی ہے، تمام بڑی، چھوٹی تاجر تنظیموں اور لیبر یونینز نے بھی ہڑتال کی حمایت کی ہے جبکہ سیاسی جماعتوں نے بھی ملک گیر ہڑتال کی حمایت کا اعلان کیا ہے۔
ذرائع کے حوالے سے یہ خبر آئی تھی کہ ایف بی آر ٹیکس اسکیم میں تاجروں کی مرضی کی تبدیلیوں کیلئے تیار ہے، اگر تاجر تیار ہوں تو ترمیمی نوٹ فوری جاری ہو سکتا ہے۔
تاہم اب وزیراعظم شہباز شریف کے کوآرڈینیٹر رانا احسان افضل نے یہ بیان جاری کیا ہے، ہم مذاکرات سے نہیں بھاگیں گے لیکن کسی صورت میں تاجروں کے پریشر میں نہیں آئیں گے۔
وزیراعظم کے کوآرڈینیٹر کا یہ کہنا تھا اگر تاجروں کو لگتا ہے ہم غلط کر رہے ہیں تو دوبارہ بیٹھ سکتے ہیں، وزیراعظم کو ایف بی آر کی تنظیم نو کرنی ہے، ریٹیل سیکٹر کو ٹیکس نیٹ میں آنا ہو گا۔
