سابق وفاقی وزیر فواد چوہدری کا کہنا ہے کہ گرفتاریوں سے اور لوگوں کو پکڑ دھکڑ سے کبھی ملک نہیں چلا کرتے۔
سابق وفاقی وزیر فواد چوہدری نے کہا کہ گرفتاریوں سے اورلوگوں کو پکڑنے سے کبھی ملک نہیں چلا کرتے، بلاول بھٹو زرداری جیت کے نشان بنا رہے تھےاور اب کہتے ہیں کہ میں لاعلم ہوں۔
سابقہ وفاقی وزیرنےکہا آئندہ 45 روز میں حکومت کا خاتمہ آپ کو نظر آئے گا، اسٹیٹ ریت کی دیوارثابت ہوئی ہے اور اب صرف دھکا باقی رہ گیا ہے۔
فواد چوہدری نے کہا کہ حکومت کو پتہ ہے عمران خان کو جیل کے دروازے پر لانا بھی انقلاب کو دعوت دینا ہے، جس دن بانی پی ٹی آئی جیل سے رہا ہونگے سڑکوں پر لوگوں کا ہجوم ہو گا۔
فواد چوہدری کا یہ کہنا تھا کہ حکومت بوکھلاہٹ کا شکار ہے، حکمران ٹولے نے لوگوں کو تقسیم کر دیا ہے، اس حکومت کی تمام پالیسیوں کی بنیاد بربریت ہے۔
سابق وفاقی وزیر نے کہا کہ آئین کا بنیادی ڈھانچہ تبدیل نہیں کیا جا سکتا، آئینی ترامیم کا ایک ہی مقصد کہ ملک میں نیا پی سی او لگایا جائے، دراصل یہ اپنی مرضی کے ججز لگوانا چاہتے ہیں۔
فواد چوہدری کا مزید یہ کہنا تھا کہ پورا پاکستان اس وقت وکلاء کے پیچھے کھڑا ہے، سینئرترین جج چیف جسٹس ہوں گے۔
