جماعت اسلامی پاکستان نے 29 ستمبر کو ملک بھر میں مظاہروں کا اعلان کر دیا۔
حکومت کیساتھ معاہدے کی مدت ختم ہونے کے بعد جماعت اسلامی پاکستان کی جانب سے 29 ستمبر کو ملک بھر میں مظاہروں کا اعلان کر دیا گیا ہے۔
امیر جماعت اسلامی حافظ نعیم کا کہنا ہے کہ حکومت نے بجلی کی قیمتوں کے حوالے سے معاہدہ کیا کہ 45 دن میں تمام شرائط مانیں گے لیکن اس پر عملدرآمد نہیں ہوا۔
امیر جماعت اسلامی نے کہا کہ آئی پی پیز کو بجلی لیے بغیر ادائیگی کی جاتی ہے، پاکستان میں بیروزگاری کی وجہ سے مایوسی پھیلی ہوئی ہے، وزراء کی مراعات ختم کرکے بجلی کی قیمتیں کم کی جائیں۔
امیر جماعت اسلامی کا کہنا تھا کہ موجودہ نظام پر خاموشی اختیار نہیں کریں گے، مطالبات منوانے کیلئے دھرنے بھی دیں گے۔
یاد رہے کہ بجلی بلز میں ریلیف سمیت دیگر مطالبات پر حکومت اور جماعت اسلامی کے درمیان معاہدہ طے پایا تھا، جس پر عمل کی مہلت دیتے ہوئے جماعت اسلامی پاکستان نے لیاقت باغ راولپنڈی میں دھرنا ختم کرنے کا اعلان کیا تھا۔
