سینیٹ میں جادو ٹونے کی روک تھام کے حوالے سے فوجداری قوانین میں ترمیم کا بل پیش کیا گیا۔
سینیٹر ثمینہ ممتاز نے پیش کردہ بل میں یہ کہا ہے کہ جادو کرنے یا اس کی تشہیر کرنے والے شخص کو 6 ماہ سے 7 سال تک قید اور 10 لاکھ روپے تک جرمانہ ہوگا اور جرم ناقابل ضمانت ہوگا۔
اسکے علاوہ ثمینہ ممتاز نے صدر اور وزیراعظم سمیت پبلک آفس رکھنے والوں کی کم از کم تعلیم گریجویشن ہونے کا آئینی ترمیمی بل بھی ایوان میں پیش کیا۔
پیش کردہ بل میں یہ کہا گیا ہے کہ صدر مملکت، وزیر اعظم کی تعلیمی قابلیت کم سے کم گریجویشن ہو، گورنر، وزیر اعلیٰ، چیئرمین اور ڈپٹی چیئرمین سینٹ، اسپیکر اور ڈپٹی اسپیکر گریجویٹ ہوں۔
دوسری جانب وزیر دفاع خواجہ آصف کی جانب سے یہ اعتراف کیا گیا ہے کہ امریکی دباؤ ایران پائپ لائن معاہدہ پورا کرنے نہیں دے رہا۔
ایک بیان میں وزیردفاع خواجہ آصف کا کہنا تھا کہ پاک ایران گیس پائپ لائن معاہدہ پاکستان کی بقا کا معاملہ ہے، ہم 18 ارب ڈالر کہاں سے دیں گے، ملک کے موجودہ مالی حالات کو دیکھتے ہوئے ہم 18 ملین بھی نہیں دے سکتے۔
