اسلام آباد، چیئرمین پی ٹی آئی بیرسٹر گوہر علی خان کا کہنا ہے کہ تمام مشکلات کے باوجود ہمارے ارکان اسمبلی متحد ہیں، پی ٹی آئی میں کوئی بھی فارورڈ بلاک نہیں۔
الیکشن کمیشن میں پی ٹی آئی انٹراپارٹی الیکشن کیس کی سماعت کے بعد میڈیا سے گفتگو کرتے ہوئے چیئرمین پی ٹی آئی بیرسٹر گوہرخان کا یہ کہنا تھا کہ ہم نے تیسری مرتبہ انٹرا پارٹی الیکشنز کے بعد 8 مارچ کو دستاویزات الیکشن کمیشن کے پاس جمع کرائی تھیں، آج تک ہمیں سرٹیفکیٹ نہیں دیا گیا۔
الیکشن کمیشن نے کہا کہ سپریم کورٹ نے 39 ارکان کو پی ٹی آئی ایم این ایز ڈیکلیئر کرنے کا حکم دیا، الیکشن کمیشن نے سپریم کورٹ سے رہنمائی مانگی ہے کہ پہلے وہ فیصلہ آ جائے، امید ہے سپریم کورٹ اپنا فیصلہ واضح کر دے گی۔
چیئرمین پی ٹی آئی کا یہ کہنا تھا کہ جو سرٹیفکیٹ ہم نے 39 امیدواروں کیلئے دیا وہ باقی کی حد تک بھی تھا، امید ظاہر کی کہ لوکل باڈیز کے انتخابات وقت پر ہی ہونگے، اگر ہوئے تو پی ٹی آئی کلین سویپ کرے گی۔
بیرسٹر گوہر علی نے کہا کہ پی ٹی آئی ایک سیاسی جماعت ہے، لوگ سابق وزیراعظم عمران خان کے نظریے کے ساتھ ہیں، ہمیں کسی سیاسی نشان کی ضرورت نہیں، شہر اقتدار کے لوکل گورنمنٹ انتخابات میں بھرپور حصہ لے کر کلین سویپ کریں گے، حکومت بلدیاتی انتخابات ملتوی کرنے کی کوشش کر رہی ہے۔
