بانی پی ٹی آئی عمران خان کی ویڈیو لنک حاضری نہ لگوانے پر جیل حکام کو شوکاز نوٹس
اے ٹی سی عدالت اسلام آباد نے بانی پی ٹی آئی عمران خان کی ویڈیو لنک پر حاضری نہ لگوانے پر اڈیالہ جیل حکام کو شوکاز نوٹس جاری کر دیا۔
انسداد دہشتگردی عدالت کے جج طاہر عباس سپرا نے تحریک انصاف کے رہنماوں کیخلاف لانگ مارچ توڑ پھوڑ کیس کی سماعت کی۔
خرم شہزاد، عامر محمود کیانی اور جمشید مغل عدالت میں پیش ہوئے۔
جج طاہر عباس سِپرا نے استفسار کیا کہ اسد عمر آئے ہیں؟ وہ کہاں ہیں؟
جس پر وکیل صفائی آمنہ علی نے کہا کہ اسد عمر مقدمے سے ڈسچارج ہو چکے ہیں۔
جج نے کہا کہ بانی پی ٹی آئی کی حاضری کے حوالے سے رپورٹ آئی ہے، رپورٹ میں کہا گیا ہے کہ انٹرنیٹ دستیاب نہیں، آن لائن حاضری نہیں ہو سکتی۔
جیل حکام کی جانب سے گزشتہ روز بھی یہی رپورٹ آئی تھی جس پر شوکاز نوٹس جاری کیا تھا اور آج بھی کر رہا ہوں۔
ان کا مزید کہنا تھا کہ نوٹس میں لکھوں گا کہ اگر انٹرنیٹ دستیاب نہیں تو عمران خان کو ذاتی حیثیت میں پیش کیا جائے۔ بعد ازاں عدالت نے کیس کی سماعت 21 اکتوبر تک ملتوی کر دی۔
