عدالت نے ایم ڈی کیٹ کے نتائج میں مبینہ بے قاعدگیوں کے خلاف درخواست پر میڈیکل یونیورسٹیوں کے وائس چانسلرز کو طلب کر لیا۔
کراچی، سندھ ہائیکورٹ کی جانب سے ایم ڈی کیٹ کے نتائج میں مبینہ بے قاعدگیوں کے خلاف درخواست پر سندھ بھر کی میڈیکل یونیورسٹیوں کے وائس چانسلرز کو طلب کرلیا گیا ہے۔
سندھ ہائیکورٹ میں درخواست کی سماعت کے دوران عدالت کا کہنا تھا کہ ایم ڈی کیٹ کے میکینزم سے لوگوں کو کرپشن اور غیر قانونی سرگرمیوں کا موقع مل رہا ہے۔
عدالت کی جانب سے یہ ہدایت کی گئی ہے کہ ایم ڈی کیٹ ٹیسٹ میں شفافیت کے لیے آغا خان بورڈ اور آئی بی اے سے مشاورت کی جائے، ان سے پوچھا جائے کہ کیا وہ ایم ڈی کیٹ ٹیسٹ لے سکتے ہیں یا نہیں؟
علاوہ ازیں عدالت کی جانب سے ایم ڈی کیٹ ٹیسٹ میں 190 سے زیادہ نمبر لینے والے طلبہ کا ریکارڈ بھی طلب کرلیا گیا ہے۔
عدالت کی جانب سے چیف سیکرٹری سندھ، سیکرٹری صحت، سیکرٹری بورڈ اینڈ یونیورسٹیز اور صدر پی ایم سی ڈاکٹر رضوان تاج کو بھی طلب کرتے ہوئے مزید سماعت 9 اکتوبر تک ملتوی کردی گئی ہے۔
