لاہور، وزیراطلاعات پنجاب عظمیٰ بخاری کا کہنا ہے کہ ا ڈیالہ جیل کا قیدی سرٹیفائیڈ جھوٹا اور بد دیانت ثابت ہو چکا ہے، صدر مسلم لیگ (ن) میاں نواز شریف جب بھی اقتدار میں آتے ہیں دو تہائی اکثریت سے آتے ہیں۔
صوبائی وزیراطلاعات عظمی بخاری نے بیرسٹر سیف کے بیان پررد عمل دیتے ہوئے کہا کہ اڈیالہ جیل کا قیدی سرٹیفائیڈ جھوٹا اور بد دیانت ثابت ہو چکا ہے، سابق وزیراعظم نواز شریف جب بھی اقتدار میں آتے ہیں دو تہائی اکثریت سے آتے ہیں۔
عظمیٰ بخاری کا کہنا تھا کہ تحریکِ انصاف کا اوڑھنا بچھونا فتنہ اور فساد ہے، صدر ن لیگ کے خلاف سازش کر کے آر ٹی ایس بٹھا کر چور دروازے سے اقتدار پر قبضہ عمران خان کی جانب سے کیا گیا تھا۔
صوبائی وزیراطلاعات کا کہنا تھا کہ دوبارہ گنتی کے نام سے آپ کی ٹانگیں کانپتی ہیں، اپوزیشن لیڈر نے کے پی، کے حلقے سے الیکشن لڑ کر رزلٹ پر حکمِ امتناع کیوں لیا؟ وفاقی دارالحکومت میں تماشہ لگانے کی بجائے پشاور میں تماشے لگائیں۔
عظمی بخاری نے کہا کہ فوجی تنصیبات پر حملے کرنے اور شہداء کے مجسمے جلانے والوں کو امن کی باتیں کرتے ہوئے شرم آنی چاہیے۔
دوسری جانب رہنما پاکستان تحریک انصاف عمر ایوب کا کہنا تھا کہ سابق وزیراعظم عمران خان کا فوجی ٹرائل نہیں ہوگا۔
سرگودھا میں میڈیا سے گفتگو کرتے ہوئے اپوزیشن لیڈر عمر ایوب نے کہا کہ پی ٹی آئی کے جن رہنماؤں کے فوجی ٹرائل ہو رہے ہیں وہ سیاسی قیدی ہیں۔
اپوزیشن لیڈر کا کہنا تھا کہ اختر مینگل سے کہا ہے کہ وہ اپنا استعفیٰ واپس لے لیں، بلوچستان آگ میں جل رہا ہے کسی کواس معاملے میں کوئی فکر نہیں ، بجلی سستی کرنے کا اعلان کر کے اگلے دن ہی بجلی مہنگی کر دی گئی، فارم 47 کی حکومت مہنگائی کنٹرول کرنے میں ناکام ہو چکی ہے۔
