اسلام آباد، اسپیکر قومی اسمبلی کی جانب سے سنی اتحاد کونسل کے ایم این اے سہیل سلطان کی نااہلی کے لیے الیکشن کمیشن کو ریفرنس بھیج دیا گیا ہے۔
اسپیکر قومی اسمبلی کو ایم این اے سنی اتحاد کونسل سہیل سلطان کے خلاف ریفرنسں موصول ہوا تھا، سہیل سلطان این اے 4 سوات سے سنی اتحاد کونسل کے ایم این اے ہیں۔
ذرائع کے مطابق اسپیکر قومی اسمبلی کی جانب سے سہیل سلطان کو نااہل قرار دینے کے لیے الیکشن کمیشن کو ریفرنس بھیج دیا گیا ہے۔
ذرائع کا کہنا ہے کہ ریفرنس سوات کے شہری نصراللہ خان کی طرف سے جمع کرایا گیا ہے، سہیل سلطان نے الیکشن کمیشن میں اپنی سرکاری ملازمت کے معاملے میں کذب بیانی سے کام لیا۔
سہیل سلطان الیکشن سے پہلے بحیثیت ڈپٹی اٹارنی جنرل پختونخوا کام کرتے رہے ہیں۔
ریفرنس کے مطابق کوئی سرکاری ملازم ملازمت کے ختم ہونے کے 2 سال بعد تک الیکشن نہیں لڑسکتا، درخواست گزار کی جانب سے اسپیکر کو ریفرنس الیکشن کمیشن بھیجنے کی استدعا کی گئی۔
درخواست گزار نے یہ استدعا کی ہے کہ ریفرنس پر فوری کارروائی کرکے متعلقہ ممبر کو نااہل قرار دیا جائے۔
