اسلام آباد، اسپیکر قومی اسمبلی ایاز صادق کی جانب سے پارلیمنٹ کے احاطے سے ہونیوالی گرفتاریوں پر ایکشن لینے کا اعلان کردیا گیا ہے۔
قومی اسمبلی کے اجلاس میں اراکین پارلیمنٹ نے گزشتہ رات پولیس کارروائی پر بات کی جس پر اسپیکر قومی اسمبلی ایاز صادق نے کہا کہ کل رات پارلیمنٹ میں جو ہوا اس پر ایکشن لیں گے۔
اسپیکر قومی اسمبلی کا کہنا تھا کہ اس پر ہر صورت اسٹینڈ لینا پڑے گا، نہ صرف سارے گیٹس کی بلکہ ہر جگہ کی ویڈیوز مانگی ہیں تاکہ جس پر ذمہ داری ڈالنا ہے ہم ڈالیں۔
ایاز صادق کا یہ کہنا تھا کہ اپنے آپ کو بدقسمت سمجھتا ہوں کہ 2014 میں ایک جماعت اور ان کے کزن نے پارلیمنٹ پر حملہ کیا تو اس کرسی پر تھا، اس لحاظ سے بدقسمت ہوں وہ پہلا حملہ تھا، دوسرا حملہ مولانا صلاح الدین ایوب کے کمرے پر چھاپہ پڑا، وہ بھی ہماری بدبختی تھی۔
لیگی رہنما کا کہنا تھا کہ کل وہ جس طرح آئے ہیں اس پر ایکشن لیں گے، خاموش نہیں رہیں گے، 2014 میں، میں نے خود ایف آئی آر درج کروائی تھی، آج بھی اگر مقدمہ درج کروانا پڑا تو ضرور درج کراؤں گا۔
ایاز صادق کا یہ کہنا تھا کہ ہم اس پر خاموش نہیں رہیں گے، ڈپٹی اسپیکر، وزیر قانون، علی محمد خان اور دیگر کیساتھ مل کر اس پر لائحہ عمل بنائیں گے۔
واضح رہے کل رات پی ٹی آئی کے کچھ ممبران اسمبلی کو پارلیمنٹ بلڈنگ کے اندر سے حراست میں لیا گیا تھا، جس پر پی ٹی آئی نے قومی اسمبلی میں شدید ردعمل دیا۔
