123
پشاور، اسلحہ و شراب برآمدگی مقدمے میں وزیراعلیٰ خیبر پختونخوا علی امین گنڈاپور کی جانب سے عدالت پیش نہ ہونے کا فیصلہ کرلیا گیا ہے۔
ذرائع کا کہنا ہے کہ علی امین گنڈاپور طبیعت ناسازی کی وجہ سے آج اسلام آباد کی عدالت میں پیش نہیں ہوں گے، وزیراعلیٰ نے ضمانت کے لئے اسلام آباد کی مقامی عدالت سے رجوع کرنے کا فیصلہ کیا ہے۔
علی امین گنڈا پور کی جانب سے ان کے وکلاء آج اسلام آباد کی عدالت میں پیش ہوں گے، وزیر اعلیٰ کے وکلاء اسلام آباد کی عدالت میں وارنٹ منسوخ کرنے کی درخواست دائر کریں گے۔
ذرائع کے مطابق عدالت سے ضمانت مسترد ہونے پر پشاور ہائیکورٹ سے راہداری ضمانت لی جائے گی۔
یاد رہے کہ اسلحہ و شراب برآمدگی کے مقدمے میں وزیراعلیٰ پختونخوا کے ناقابل ضمانت وارنٹ گرفتاری جاری ہوئے ہیں، اسلام آباد کی عدالت کی جانب سے علی امین گنڈاپور کو گرفتار کرکے پیش کرنے کے احکامات جار ی کردیے گئے ہیں۔
