علیمہ خانم نے ہوم سیکرٹری پنجاب اور سپریٹنڈنٹ اڈیالہ جیل کے خلاف کارروائی کی استدعا کر دی۔
اسلام آباد: بانی پاکستان تحریک انصاف سے جیل میں ملاقات نہ کرانے پر علیمہ خانم نے اسلام آباد ہائیکورٹ میں توہین عدالت کی درخواست دائر کر دی ہے۔ درخواست میں ہوم سیکرٹری پنجاب اور سپریٹنڈنٹ اڈیالہ جیل کو فریق بنایا گیا ہے۔
درخواست گزار نے مؤقف اختیار کیا کہ سابق وزیراعظم مختلف کیسز میں جیل ٹرائل کا سامنا کر رہے ہیں لیکن عدالتی احکامات کے باوجود ملاقات کی اجازت نہیں دی جا رہی۔
درخواست میں مزید کہا گیا کہ 26 اکتوبر کے عدالتی حکم کے تحت علیمہ خانم کو ملاقات کی اجازت دی گئی تھی اور ملاقات کرنے والوں کی فہرست بھی جمع کروائی گئی تھی، اس کے باوجود سپریٹنڈنٹ جیل نے متعدد بار ملاقات سے روک دیا۔
علیمہ خانم نے عدالت سے استدعا کی کہ فریقین نے عدالتی حکم کی خلاف ورزی کرتے ہوئے غیر قانونی طور پر پابندیاں عائد کیں، جس پر توہین عدالت کی کارروائی عمل میں لائی جائے۔
