سی ڈی اے نے ایف نائن پارک میں کرکٹ اسٹیڈیم کی تعمیر کے لیے سابق کپتان راشد لطیف کو مشیر مقرر کر دیا، ڈیزائن میں گرین ایریا برقرار رکھنے کی تجویز زیر غور، سپریم کورٹ سے کلیئرنس کا امکان۔
اسلام آباد، کیپیٹل ڈیولپمنٹ اتھارٹی (سی ڈی اے) نے ایف نائن پارک کو کرکٹ اسٹیڈیم کی تعمیر کے لیے منتخب کر لیا ہے اور اس منصوبے میں سابق کرکٹر راشد لطیف کو تکنیکی مشیر مقرر کیا گیا ہے۔
ذرائع کے مطابق راشد لطیف اسٹیڈیم کے ڈیزائن اور تکنیکی پہلوؤں پر سی ڈی اے کو معاونت فراہم کریں گے، وہ اس سے قبل اسلام آباد کلب کی تعمیر میں بھی اہم کردار ادا کر چکے ہیں۔
سپریم کورٹ کے گرین ایریا سے متعلق فیصلے کے باعث منصوبے میں قانونی پہلوؤں کو مدنظر رکھا جا رہا ہے، تجویز دی گئی ہے کہ اسٹیڈیم میں بیشتر حصہ گرین ایریا کے طور پر برقرار رکھا جائے۔ ذرائع کا کہنا ہے کہ جنوبی افریقہ اور ویسٹ انڈیز کے کرکٹ اسٹیڈیمز کی طرز پر چند اینکلوژرز میں گرین اسپیس رکھی جائے گی۔
سی ڈی اے منصوبے کی کلیئرنس کے لیے سپریم کورٹ سے رجوع کرنے کا بھی ارادہ رکھتا ہے۔ واضح رہے کہ اس سے قبل سپریم کورٹ نے شکرپڑیاں میں کرکٹ اسٹیڈیم کی تعمیر روک دی تھی۔
