صدر آصف علی زرداری کا کہنا ہے کہ اسرائیل نے فلسطین میں دہشت گردی کا بازار گرم کر رکھا ہے۔
عالمی یوم امن کے موقع پر جاری کیے گئے اپنے پیغام میں صدر پاکستان آصف علی زرداری کا کہنا تھا کہ عالمی یوم امن پر اقوامِ عالم کے مابین امن کے اصولوں کے ساتھ وابستگی کا ارادہ کرتے ہیں۔
آصف علی زرداری نے کہا کہ آج دنیا کو مختلف علاقوں میں جغرافیائی سیاسی کشیدگی کا سامنا ہے، تنازعات عالمی امن کو خطرے میں ڈال رہے ہیں۔
صدر پاکستان نے کہا کہ اسرائیل، ہزاروں لوگوں کے غزہ میں قتل عام سے فلسطینیوں کی نسل کشی کر رہا ہے۔
آصف زرداری کا کہنا تھا کہ ہم سب کو اقوامِ عالم کے مابین امن اور بقائے باہمی کا کلچر فروغ دینے کی ضرورت ہے۔
صدر پاکستان کا کہنا تھا کہ بین الاقوامی قوانین اور انسانی حقوق کی کھلی خلاف ورزیاں عالمی امن کے لیے خطرہ ہیں، ہمیں ناانصافی اور ظلم کے خلاف آواز بلند کرنے کی ضرورت ہے۔
آصف زرداری کا یہ بھی کہنا ہے کہ دنیا امن کے بغیر ترقی اور خوشحالی حاصل نہیں کرسکتی، جنگیں اور تنازعات لوگوں کی مشکلات میں اضافہ کرتے ہیں۔
