24
اسلام آباد، نائب وزیراعظم و وزیر خارجہ محمد اسحاق ڈار اور ازبکستان کے وزیر خارجہ کے درمیان ٹیلیفونک رابطہ ہوا ہے جس میں دوطرفہ تعاون اور خطے کی تازہ صورتحال پر تفصیلی تبادلہ خیال کیا گیا۔
ترجمان دفتر خارجہ کے مطابق دونوں رہنماؤں نے پاکستان، افغانستان اور ازبکستان کے مابین مجوزہ ریلوے لائن منصوبے پر بھی گفتگو کی، جسے علاقائی رابطوں کے فروغ کے لیے ایک اہم پیش رفت قرار دیا جا رہا ہے۔
رابطے کے دوران اسحاق ڈار نے پاکستان کی جانب سے ازبکستان کے ساتھ قریبی تعلقات کو مزید وسعت دینے کے عزم کا اظہار کیا۔ ازبک وزیر خارجہ نے بھی مختلف شعبوں میں باہمی تعاون کو مزید مستحکم بنانے پر زور دیا۔
یاد رہے کہ اس سے قبل اسحاق ڈار کا آذربائیجان کے وزیر خارجہ سے بھی رابطہ ہوا تھا، جس میں دو طرفہ تعلقات اور وزیر اعظم پاکستان کے ممکنہ دورہ آذربائیجان پر گفتگو کی گئی تھی۔
