اسلام آباد، سینئر رہنما پاکستان پیپلز پارٹی سید خورشید شاہ کا کہنا ہے کہ اختر مینگل کا استعفی اپنی سیاست کو بچانے کے لیے ہے۔
رہنما پیپلز پارٹی خورشید شاہ کا میڈیا سے گفتگو کرتے ہوئے یہ کہنا تھا کہ چیئرمین بلوچستان نیشنل پارٹی اختر مینگل کا استعفی اپنی سیاست کو بچانے کے لیے ہے۔
رہنما پیپلز پارٹی نے کہا کہ اختر مینگل وزیر اعلیٰ بلوچستان بھی رہے، حکومت میں بھی رہے اور اتحادی بھی بنے۔
خورشید شاہ کا کہنا تھا کہ اختر مینگل کے پاس اپنی سیاست کو بچانے کے لیے دوسر اکوئی راستہ نہیں تھا، استعفی دے کر وہ یہ بتا رہے ہیں کہ میرے جیسا چمپیئن کوئی نہیں۔
رہنما پی پی کا کہنا تھا کہ بلوچستان کا مسئلہ بلوچوں کو حل کرنا پڑے گا، حکومت کو بھی یہ سوچنا پڑے گا کہ بلوچستان کے لوگوں کے مسائل کا حل کیا ہے۔
انہوں نے کہا کہ بلوچستان پرامن صوبہ تھا، حالات اور وقت نے اس صوبے کو متاثر کردیا، لوگوں کو بلایا بھی گیا اور معافیاں بھی دی گئیں، لیکن بلوچوں کو اعتماد میں نہیں لیا گیا۔ یہ اعتماد اب قائم کرنا ہے۔
