21
وفاقی وزیر منصوبہ بندی احسن اقبال نے اعلان کیا ہے کہ حکومت نے تیرہویں پانچ سالہ ترقیاتی منصوبے کے تحت 2029 تک ملکی شرحِ نمو کو 6 فیصد تک پہنچانے کا ہدف مقرر کیا ہے۔
اسلام آباد میں ایک پریس کانفرنس کے دوران، جہاں ان کے ہمراہ چیف اکنامسٹ ڈاکٹر امتیاز احمد بھی موجود تھے، احسن اقبال نے بتایا کہ آئندہ پانچ برسوں میں معیشت کا مجموعی حجم 600 ارب ڈالر تک لے جانے کا عزم کیا گیا ہے۔
وفاقی وزیر کے مطابق 2029 تک وفاق کا ترقیاتی بجٹ 1700 ارب روپے جبکہ صوبوں کا ترقیاتی بجٹ 2338 ارب روپے تک بڑھایا جائے گا، جس سے ملکی ترقی کا ایک جامع اور مربوط فریم ورک تشکیل پائے گا۔
احسن اقبال نے مزید بتایا کہ سابق وزیر اعظم عمران خان کے دورِ حکومت میں برطانیہ کی نیشنل کرائم ایجنسی سے وصول کی گئی 190 ملین پاؤنڈ کی رقم سے اسلام آباد میں دانش یونیورسٹی قائم کی جائے گی،یہ اقدام وزیر اعظم شہباز شریف کی منظوری سے کیا جا رہا ہے، جو تعلیم اور ترقی کو قومی ایجنڈا بنانے کے حکومتی عزم کا مظہر ہے۔
