لاہور، وزیراعلیٰ پنجاب مریم نواز شریف نے کہا کہ آج کا دن غیرت، جرأت اور قومی اتحاد کی عظمت کا دن ہے۔
مریم نواز شریف نے وزیراعظم شہباز شریف کے یومِ تشکر منانے کے فیصلے کا خیرمقدم کرتے ہوئے کہا کہ ہم اللہ کے شکر گزار ہیں کہ دشمن کے ناپاک عزائم کو ناکام بنایا۔ یہ دن صرف شکریے کا نہیں بلکہ غیرت، جرات اور قومی یکجہتی کی فتح کا دن ہے۔
ان کا کہنا تھا کہ پاک فوج ایک عظیم، پروفیشنل اور باصلاحیت ادارہ ہے، جس نے بھارت کی جارحیت کا جواب صرف طاقت سے نہیں، بلکہ حکمت سے دیا۔ ہمارے شاہینوں نے دشمن کے طیارے گرا کر دنیا کو یہ پیغام دیا کہ پاکستان کا دفاع ناقابلِ تسخیر ہے۔ اب دنیا نے یہ سمجھ لیا ہے کہ پاکستان اپنے دفاع میں کبھی پیچھے نہیں ہٹے گا۔
انہوں نے کہا کہ ان بہادر جوانوں کو سلام جو دشمن کی آنکھوں میں آنکھیں ڈال کر یہ ثابت کر گئے کہ پاکستان نہ تو کمزور ہے اور نہ ہی بزدل، پاکستان کی قیادت مخلص ہے، قوم متحد ہے اور افواج ناقابلِ شکست ہیں، ہم اپنے شہداء کی قربانیوں کو کبھی ضائع نہیں جانے دیں گے۔
وزیراعلیٰ پنجاب نے مزید کہا کہ ہم نوجوانوں کو تعلیم، مہارت اور جدید ٹیکنالوجی کے ذریعے طاقتور بنائیں گے، اور ایسا پاکستان بنائیں گے جسے دنیا کوئی بھی دشمن میلی آنکھ سے نہیں دیکھ سکے گا۔
