اسلام آباد، وفاقی وزیر داخلہ محسن نقوی کا کہنا تھا کہ آج قائداعظم محمد علی جناح کے اصولوں پر عمل پیرا ہونے کی جتنی ضرورت ابھی ہے شاید پہلے کبھی نہ تھی۔
قائد اعظم محمد علی جناح کی 76 ویں برسی پر اپنے پیغام میں وفاقی وزیر داخلہ محسن نقوی کا یہ کہنا تھا کہ انتھک جدوجہد اور ایمانداری قائد اعظم کی شخصیت کو ممتاز کرتے ہیں، قائد اعظم کی جرات مندانہ قیادت کے بغیر آزاد وطن کا خواب کبھی شرمندہ تعبیر نہ ہوتا۔
وفاقی وزیر داخلہ نے کہا کہ قائد اعظم محمد علی جناح کا یہ احسان تا قیامت نہیں اتار سکتے کہ آج ہم بحیثیت قوم آزاد وطن میں سانس لے رہے ہیں، آج بانی پاکستان کے اصولوں پر عمل پیرا ہونے کی جتنی ضرورت ہے شاید پہلے کبھی نہ تھی۔
محسن نقوی کا یہ کہنا تھا کہ معمار پاکستان کے ملک میں کسی کو لسانی، طبقاتی اور گروہی بنیادوں پر فضلیت حاصل نہیں، قائد اعظم کے پاکستان میں اقلیتوں سمیت ہر ایک کو یکساں حقوق حاصل ہیں، بدقسمتی سے محمد علی جناح کے سنہری اصولوں پر عمل نہ کر کے ہم اقوام عالم میں پیچھے رہ گئے ہیں۔
وفاقی وزیر داخلہ کا کہنا تھا کہ ہمیں یہ عزم کرنا چاہیے کہ قائد اعظم کے اصولوں کے مطابق ترقی اور استحکام کیلئے ذمہ داریاں پوری کریں گے۔
