پشاور، خیبرپختونخوا حکومت کا ائیر ایمبولینس منصوبہ فنڈز کی عدم دستیابی کی وجہ سے تاخیر کا شکار ہے۔
ذرائع کے مطابق، کے پی حکومت نے بجٹ میں ائیر ایمبولینس کے لیے رقم مختص کی تھی مگر محکمہ خزانہ کی جانب سے ائیر ایمبولینس کے لیے ابھی تک رقم جاری نہیں کی گئی جبکہ ہیلی کاپٹر کو ائیر ایمبولینس کے طور پر استعمال کرنے کے لیے موڈیفکیشن بھی کرانی ہے۔
فوکل پرسن ائیرایمبولینس کمیٹی خورشید خان نے نجی ٹی وی چینل سے گفتگو کرتے ہوئے یہ کہا کہ فنڈز نہ ہونے کی وجہ سے منصوبہ تاخیر کا شکار ہے، محکمہ خزانہ کو رقم جاری کرنے کے لیے درخواست کی ہے۔
خورشید خان کا یہ کہنا تھا کہ فوج، وفاقی اور صوبائی اداروں نے ائیر ایمبولینس کے لیے مکمل معاونت کی ہے اور ڈونرز منتظر ہیں کہ منصوبے پر کام شروع ہو۔
دوسری جانب مشیر خزانہ خیبر پختونخوا مزمل اسلم نے کہا کہ محکمہ صحت سے سمری آئے گی تو فنڈز جاری کر دیں گے۔
یاد رہے کہ وزیراعلیٰ علی امین گنڈاپور کی جانب سے رواں سال اپریل میں حکام کو 4 مہینے کے اندر ائیر ایمبولینس سروس شروع کرنے کی ہدایت کی گئی تھی۔
