رہنما تحریک انصاف و سینیٹر شبلی فراز کا کہنا ہے کہ ملک کی سب سے بڑی جماعت کو دیوار سے لگایا جارہا ہے۔
اسلام آباد، رہنما پی ٹی آئی سینیٹر شبلی فراز کا کہنا ہے کہ ملک کرائسز کا متحمل نہیں ہو سکتا، ملک کی سب سے بڑی جماعت کو دیوار سے لگایا جارہا ہے۔
پی ٹی آئی رہنماؤں کے ساتھ پارلیمنٹ ہاؤس میں مشترکہ پریس کانفرنس کرتے ہوئے سینیٹر شبلی فرازنے کہا کہ آج جو باتیں ہم یہاں کر رہے ہیں ہم نے سینیٹ کے ایوان میں کرنی تھیں، بدقسمتی سے سینیٹ کو مچھلی منڈی بنا دیا گیا ہے، فارم 47 والے روزانہ ہمیں یاد دہانی کرواتے ہیں کہ حکومت جعلی ہے۔
رہنما پی ٹی آئی کا کہنا تھا کہ حکومت نے سازش کے تحت کورم کی نشاندہی کی، ہم نے ملک کی سکیورٹی صورتحال کے حوالے سے بات کرنی تھی، یہ جعلی ووٹوں سے بٹھائے گئے ہیں، یہ کسی معاملے پر بات ہی نہیں کرنے دے رہے، پارلیمان کو ایک معذور ادارہ بنا کر رکھ دیا ہے۔
رہنما پی ٹی آئی کا یہ کہنا تھا کہ حکومت جو قوانین بنا رہی یہ عوامی مفاد میں نہیں ہیں، جوڈیشری اور پارلیمان کو کنٹرول کیا جارہا ہے، یہ ملک کا کیا تاثر دینا چاہتے ہیں؟ ملک کی سب سے بڑی سیاسی جماعت پی ٹی آئی کو دیوار سے لگایا جارہا ہے۔
رہنما پی ٹی آئی کا کہنا تھا کہ انکے اندر بات سننے کا حوصلہ ہی نہیں ہے، کیسے ملکی معاملات چلیں گے؟ ہم نے یہ کوشش کی ہے کہ سیاسی کوشش کو پر امن رکھیں، ہم آئین اور قانون کے اندر رہتے ہوئے اقدامات لے رہے ہیں۔
