وفاقی وزیر منصوبہ بندی احسن اقبال کا کہنا ہے کہ حکومت کو پی آئی اے کی نجکاری میں کامیابی نہیں ہوئی، کسی بھی قومی ادارے کو کوڑیوں کے بھاؤ نہیں بیچیں گے۔
وفاقی وزیر نے کہا کہ بھارت میں بھی ایئر انڈیا کی نیلامی 3 سے 4 مرتبہ کے بعد ہوئی، تحریک انصاف حکومت کے جھوٹے پراپیگنڈے کی وجہ سے پی آئی اے کی یہ حالت ہوئی۔ یورپ اور برطانیہ میں روٹس کھلیں گے تو قومی ایئرلائن (پی آئی اے) کی حالت بہتر ہو جائے گی۔
احسن اقبال کا کہنا تھا کہ سابق وزیر ہوا بازی کے ایک بیان کی وجہ سے ہمیں اربوں روپے کا نقصان اٹھانا پڑا۔
احسن اقبال کا کہنا تھا کہ اگر بجلی کو سستا کرکے فراہم کیا جائے تو اس سے معیشت بہتر ہو گی، سردیوں میں بجلی کے بلوں میں عوام کو ریلیف ملے گا۔
وفاقی وزیر نے کہا کہ میاں نواز شریف کی نا اہلی کا فیصلہ ایک سیاسی فیصلہ تھا، جس کی سزا عوام اور پورا ملک بھگت رہا ہے۔
ایک سوال کے جواب میں احسن اقبال نے کہا کہ عدلیہ کے جو الاؤنسز بڑھائے گئے ہیں اس کا جواب وزیر قانون دیں گے، آئینی بینچ سپریم کورٹ کے ججز پر ہی مشتمل ہوگا۔
