اسلام آباد، اپوزیشن لیڈر قومی اسمبلی اور رہنما تحریک انصاف عمر ایوب کا کہنا ہے کہ عمران خان واحد سابق وزیراعظم ہیں جن کا جیل ٹرائل ہو رہا ہے۔
جوڈیشل کمپلیکس اسلام آباد کے باہر میڈیا سے گفتگو کے دوران اپوزیشن لیڈر عمر ایوب نے کہا کہ چیف جسٹس نے مجھے بطور اپوزیشن لیڈر ملاقات کیلئے بلایا تھا، عمران خان سے جب میری ملاقات ہوئی تو وہاں پر میں نے 3 بار ان سے ملاقات بارے اجازت مانگی۔
سابق وزیراعظم عمران خان نے ہمیں کہا کہ چیف جسٹس سے ملاقات کر لیں، ہم نے اپنا ایجنڈا چیف جسٹس کے سامنے بھیجا تھا۔
اپوزیشن لیڈر کا کہنا ہے کہ ہمارے ایجنڈے میں انسانی حقوق اور جوڈیشل ریفارمز کی بات کی گئی تھی، ہم نے چیف جسٹس سے کہا بانی پی ٹی آئی اور بشری ٰبی بی اس وقت جیل میں ہیں، جیل میں عمران خان اور بشری ٰبی بی کے حقوق کو جان بوجھ کر سلب کیا گیا ہے، ہماری ملاقاتیں نہیں کرائی جاتیں اور نا ہی بانی پی ٹی آئی سے ان کے بیٹوں کی ملاقات کرائی جاتی ہے۔
عمر ایوب کا کہنا تھا کہ ہم نے چیف جسٹس سے ملاقات میں کہا کہ اس وقت جو حالات لوئر جوڈیشری میں ہیں تو آگے جا کے کیا ہوگا، بانی پی ٹی آئی واحد سابق وزیراعظم ہیں جن کا ٹرائل جیل میں ہو رہا ہے، باقی سابق وزرائے اعظم کا اوپن کورٹس میں ٹرائل ہوتا رہا ہے۔
اپوزیشن لیڈر نے کہا کہ پی ٹی آئی کارکنان کیساتھ پولیس گردی ہو رہی ہے، پنجاب، اسلام آباد، سندھ اور بلوچستان میں پی ٹی آئی کے رہنماؤں کو تنگ کیا جا رہا ہے۔
