لاہور، وزیراعلیٰ پنجاب مریم نواز نے کہا ہے کہ صوبے میں "صحت مند پنجاب” کے وژن کے تحت وسیع پیمانے پر ہیلتھ ریفارمز کا آغاز کر دیا گیا ہے۔
عالمی یوم صحت کے موقع پر اپنے پیغام میں مریم نواز شریف نے کہا کہ ہم پنجاب کے عوام کو اعلیٰ معیار کی علاج معالجے کی سہولتیں فراہم کرنے کے عزم کا اعادہ کرتے ہیں، فیلڈ ہسپتالوں کے ذریعے لاکھوں افراد کو چند ہی ماہ میں ان کے گھروں کے قریب علاج کی سہولیات فراہم کی جا رہی ہیں۔
انہوں نے بتایا کہ پنجاب میں پہلی مرتبہ 1250 بنیادی مراکز صحت کو جدید کلینکس میں تبدیل کیا جا رہا ہے، اور پہلی بار شہریوں کو ان کے گھروں پر ادویات کی ترسیل یقینی بنائی جا رہی ہے، یہ ہیلتھ کلینکس بنیادی مراکز صحت سے زیادہ بہتر طبی سہولتیں فراہم کر رہے ہیں۔
وزیراعلیٰ پنجاب کا کہنا تھا کہ بڑے سرکاری ہسپتالوں میں علاج، تشخیصی ٹیسٹ اور دواؤں کی فراہمی کے لیے مؤثر اقدامات کیے جا رہے ہیں، پنجاب میں پہلا سرکاری کینسر ہسپتال اور سرگودھا میں کارڈیالوجی انسٹیٹیوٹ جلد ہی کام شروع کر دیں گے۔
انہوں نے بتایا کہ چیف منسٹر چلڈرن ہارٹ سرجری پروگرام اور ٹرانسپلانٹ کارڈ متعارف کرائے جا چکے ہیں، جبکہ دور دراز علاقوں سے ایمرجنسی کی صورت میں مریضوں کو بڑے شہروں میں منتقل کرنے کے لیے ایئر ایمبولینس سروس کا آغاز بھی کر دیا گیا ہے۔
مریم نواز نے کہا کہ عالمی یوم صحت کا مقصد صحت سے جڑے مسائل پر عوام اور پالیسی سازوں کی توجہ مرکوز کرنا ہے، سال 2025 کے عالمی یوم صحت کا تھیم "صحت مند آغاز، پُرامید مستقبل” ہے، جو ماں اور بچے کی صحت پر زور دیتا ہے۔
انہوں نے زور دیا کہ علاج کی سہولیات کے ساتھ ساتھ صحت مند طرزِ زندگی کے شعور کو بھی عام کرنا ہوگا، ان کے بقول، ایک صحت مند آبادی ہی خوشحال، پُرامن اور مستحکم معاشرے کی بنیاد ہوتی ہے،عالمی یوم صحت ہمیں یاد دلاتا ہے کہ اچھی صحت کے لیے روزمرہ زندگی میں مثبت تبدیلیاں ضروری ہیں۔
