سعودی عرب کے فرمانروا خادم حرمین شریفین شاہ سلمان بن عبدالعزیز کی جانب سے پاکستان کے لیے 20 ٹن کھجوروں کا تحفہ بھجوایا گیا۔
گجرات: سعودی عرب کے فرمانروا خادم حرمین شریفین شاہ سلمان بن عبدالعزیز کی جانب سے پاکستان کے لیے 20 ٹن کھجوروں کا تحفہ بھجوایا گیا، جسے مستحق افراد میں تقسیم کیا جائے گا۔ اس سلسلے میں منعقدہ تقریب کا افتتاح وفاقی وزیر برائے مذہبی امور و بین المذاہب ہم آہنگی چوہدری سالک حسین اور سعودی سفیر نواف بن سعید المالکی نے کیا۔
سعودی سفیر نواف بن سعید المالکی نے اس موقع پر کہا کہ روزہ داروں کے لیے افطار اور کھجوروں کی تقسیم کا یہ پروگرام خادم حرمین شریفین کے رمضان المبارک کے جذبہ خیر سگالی کا حصہ ہے، جو پاکستان سمیت کئی ممالک میں نافذ کیا جا رہا ہے۔ اس کا مقصد غریب خاندانوں، بیواؤں اور یتیموں کی مدد کرنا، انہیں خوشی کے مواقع فراہم کرنا اور غذائی ضروریات پوری کر کے مشکلات کم کرنا ہے۔
پروگرام کے تحت 20 ٹن کھجوریں 40 ہزار مستحق افراد میں تقسیم کی جائیں گی، جبکہ 30 ہزار افراد افطار پروگرام سے مستفید ہوں گے۔ یہ پروگرام رمضان المبارک کے پورے مہینے پاکستان کے تمام صوبوں میں جاری رہے گا، جو سعودی حکومت اور عوام کی پاکستانی عوام کے ساتھ دوستی اور بھائی چارے کی علامت ہے۔
وفاقی وزیر چوہدری سالک حسین نے سعودی حکومت، شاہ سلمان بن عبدالعزیز اور سعودی عوام کا شکریہ ادا کرتے ہوئے کہا کہ یہ تحائف دونوں ممالک کے درمیان گہری دوستی، بھائی چارے اور خیر سگالی کی علامت ہیں۔ انہوں نے کہا کہ پاکستان ہمیشہ سعودی عرب کے اس جذبہ اخلاص کو قدر کی نگاہ سے دیکھتا ہے اور اس تعلق کو مزید مضبوط بنانے کے لیے پرعزم ہے۔
