رمضان المبارک نیکیوں، برکتوں، رحمتوں اور مغفرت کا مہینہ ہے، اسے بہتر طریقے سے گزارنے کے لیے چند اہم نکات درج ذیل ہیں۔
روزہ صرف بھوکا اور پیاسا رہنے کا نام نہیں، بلکہ اللہ کی رضااور خوسنودی حاصل کرنے کا نام بہترین ذریعہ ہے۔ ہر روز صبح نیت کریں کہ یہ روزہ اللہ کی خوشنودی کے لیے ہے۔
سحری کو لازم پکڑیں:
سحری کرنا سنت ہے، اسے ہرگز نہ چھوڑیں۔ ہلکی، صحت بخش اور دیر ہضم غذا کھائیں جیسے دہی، دودھ، کھجور اور چکی کا آٹا۔ پانی زیادہ پئیں تاکہ دن بھر پیاس نہ لگے۔
نمازوں کی پابندی کریں:
پانچ وقت کی نماز باجماعت ادا کریں۔ تہجد اور اشراق کی نماز پڑھنے کی عادت ڈالیں۔ تراویح میں قرآن سننے اور پڑھنے کا خصوصی اہتمام کریں۔
تلاوتِ قرآن کریں:
رمضان قرآن کا مہینہ ہے، اس میں زیادہ سے زیادہ تلاوت قرآن کا اہتمام کریں ۔ روزانہ کم از کم ایک پارہ پڑھنے کی کوشش کریں۔ اگر عربی نہیں آتی تو ترجمہ اور تفسیر کے ساتھ پڑھیں۔
دعا اور استغفار کریں:
رمضان دعا کی قبولیت کا مہینہ ہے، ہر وقت اللہ سے دعا مانگیں۔ مغفرت، رحمت اور جنت طلب کریں، جہنم سے نجات کی بھی دعا کریں۔ اپنے، والدین، اہلِ خانہ اور امتِ مسلمہ کے لیے دعا کریں۔
افطار میں اعتدال رکھیں:
افطار میں جلدی کریں، کھجور اور پانی سے روزہ کھولیں۔ زیادہ چکنائی، مصالحے دار اور ثقیل کھانے سے پرہیز کریں تاکہ صحت برقرار رہے۔ غریبوں اور ضرورت مندوں کو افطار کرانے کا اہتمام کریں۔
زکوٰۃ اور صدقہ دیں:
رمضان میں نیکیاں بڑھا چڑھا کر ملتی ہیں، اس لیے زیادہ سے زیادہ صدقہ کریں۔ زکوٰۃ ادا کریں تاکہ حق داروں کا حق ان تک پہنچے۔ راشن، کپڑے، کھانے پینے کی اشیاء اور دیگر ضروریات فراہم کریں۔
برے اعمال سے بچیں:
جھوٹ، غیبت، چغلی، گالی گلوچ، غصہ اور دیگر گناہوں سے بچیں۔ آنکھوں، زبان، کان اور دل کو پاک رکھیں۔ فضول وقت ضائع کرنے کے بجائے نیکیوں میں گزاریں۔
آخری عشرہ اور لیلۃ القدر:
آخری عشرہ عبادت، ذکر، دعا اور اعتکاف میں گزارنے کی کوشش کریں۔ طاق راتوں میں خاص طور پر عبادت کریں کیونکہ لیلۃ القدر ان میں سے کسی ایک رات میں ہوتی ہے۔
رمضان کے ماہ کی دعاؤں کا کثرت کیساتھ ورد کریں۔
عید کی تیاری اور سبق:
رمضان کو صحیح طریقے سے گزارنے کی برکت عید کی خوشی میں نظر آتی ہے۔ عید پر تکبر اور اسراف سے بچیں، سادگی اختیار کریں۔ رمضان کی عبادات اور اچھے اعمال کو عید کے بعد بھی جاری رکھنے کی نیت کریں۔
رمضان صبر، تقویٰ اور قربتِ الٰہی حاصل کرنے کا مہینہ ہے، اس میں جتنا زیادہ وقت عبادت، نیکی اور اچھے اعمال میں گزاریں گے، اتنا ہی زیادہ اجر و ثواب ملے گا، اللہ تعالیٰ ہمیں رمضان المبارک کی برکتیں نصیب فرمائے اور ہمیں اس کا صحیح حق ادا کرنے کی توفیق عطا کرے۔
