رمضان المبارک کے دوران مہنگائی میں مسلسل اضافہ ہو رہا ہے اور اس دوران کئی اشیا مزید مہنگی ہو گئی ہیں۔
اسلام آباد: رمضان المبارک کے دوران مہنگائی میں مسلسل اضافہ جاری ہے اور کئی بنیادی اشیا کی قیمتوں میں نمایاں اضافہ دیکھا گیا ہے۔ وفاقی ادارہ شماریات کی جاری کردہ رپورٹ کے مطابق رمضان کے دوسرے ہفتے میں مہنگائی کی شرح 0.22 فیصد مزید بڑھ گئی ہے۔
رپورٹ کے مطابق مسلسل پندرہویں ہفتے چینی کی قیمت میں اضافہ ریکارڈ کیا گیا، جس کی قیمت میں 9 روپے 26 پیسے فی کلو اضافہ ہوا ہے۔ اسی طرح ایک ہفتے میں 12 اشیائے ضروریہ مزید مہنگی ہو گئی ہیں، جن میں ٹماٹر 21 روپے 37 پیسے، برائلر مرغی 30 روپے 64 پیسے، کیلے 12 روپے 18 پیسے فی درجن اور بیف 6 روپے فی کلو مہنگا ہوا ہے۔
علاوہ ازیں ایل پی جی گھریلو سلنڈر 46 روپے 19 پیسے مزید مہنگا ہو چکا ہے، جس سے عام عوام کی مشکلات میں مزید اضافہ ہو گیا ہے۔
دوسری جانب کچھ اشیا کی قیمتوں میں کمی بھی ریکارڈ کی گئی۔ پیاز 13 روپے 97 پیسے، آلو 5 روپے 16 پیسے، اور لہسن 35 روپے 63 پیسے فی کلو سستا ہوا ہے۔ اس کے علاوہ دال چنا، دال ماش، انڈے، دال مسور، چاول، خوردنی تیل اور گھی کی قیمتوں میں بھی معمولی کمی دیکھی گئی ہے۔
ماہ رمضان میں بڑھتی ہوئی مہنگائی سے عوام شدید پریشان ہیں اور حکومت سے قیمتوں پر قابو پانے کے فوری اقدامات کا مطالبہ کر رہے ہیں۔
