اسپیکر پنجاب اسمبلی ملک محمد احمد خان نے کہا ہے کہ سابق آرمی چیف جنرل ریٹائرڈ قمر جاوید باجوہ کیساتھ میری ذاتی دوستی کل بھی تھی اور آج بھی ہے۔
لاہور میں میڈیا سے گفتگو کرتے ہوئے اسپیکر پنجاب اسمبلی ملک محمد احمد خان کا یہ کہنا تھا خواجہ آصف کے کل کے دونوں پروگرام میں بیانات سنے، جنرل باجوہ نے صاف کہا تھا کہ وہ توسیع نہیں لے رہے، مجھے پہلے بھی ایکسٹینشن مل چکی ہے اب مناسب نہیں لگتا۔
ن لیگی رہنما کا یہ کہنا تھا کہ میری جنرل (ر) باجوہ سے سیاسی بات چیت بہت کم ہوتی تھی، انہوں نے امریکی سفارت خانے کی ایک ایک میٹنگ میں توسیع کی تردید کردی تھی، خواجہ آصف کے ذہن سے شاید کچھ باتیں نکل گئی ہوں، جنرل باجوہ کی بدنیتی ہوتی تو ان کے پاس بہت آپشنز موجود تھے۔
اسپیکر پنجاب اسمبلی کا یہ کہنا تھا کہ میں کبھی اس معاملے پر بات نہیں کرتا، جنرل (ر)باجوہ کے ساتھ میری ذاتی دوستی تھی اور آج بھی ہے، میں آج حقائق درست کرنے کیلئے بات کر رہا ہوں، جنرل باجوہ کا کہنا تھا کہ بہت سے افسران ہیں جن کا آگے آنا حق بنتا ہے۔
اسپیکر پنجاب اسمبلی نے اپنی گفتگو میں کہا کہ آرمی چیف کی مدت ملازمت میں توسیع کا معاملہ تو حکومت کرتی ہے، جنرل (ر) باجوہ کوایکسٹینشن دینے کیلئے پیپلز پارٹی، مسلم لیگ ن اور سب نے ووٹ کیا۔
ملک احمد خان کا کہنا تھا خواجہ آصف اپنی ملاقاتوں میں کی گئی کچھ باتوں کا ذکر کر رہے ہیں، خواجہ صاحب کی ریکروٹ کرنے والی بات کا میرے پاس کوئی ثبوت نہیں، جنرل (ر) باجوہ لوکل اور عالمی میڈیا میں بھی کہہ چکے تھے کہ وہ اب ایکسٹینشن نہیں لیں گے۔
