حضرت عمر رضی اللہ عنہ فرماتے ہیں کہ ایک دن ہمیں رسول اللہ صلی اللہ علیہ وسلم نے حکم دیا کہ ہم صدقہ کریں، اتفاق سے اس وقت میرے پاس دولت تھی، میں نے کہا کہ اگر میں کسی دن ابوبکر رضی اللہ عنہ پر سبقت لے جا سکوں گا تو آج کا دن ہو گا، چنانچہ میں اپنا آدھا مال لے کر آیا۔
رسول اللہ صلی اللہ علیہ وسلم نے پوچھا: ”اپنے گھر والوں کے لیے تم نے کیا چھوڑا ہے؟“ میں نے کہا: اسی قدر یعنی آدھا مال۔۔
اور ابوبکر رضی اللہ عنہ اپنا سارا مال لے کر حاضر ہوئے، رسول اللہ صلی اللہ علیہ وسلم نے ان سے پوچھا: ”اپنے گھر والوں کے لیے تم نے کیا چھوڑا ہے؟“ انہوں نے کہا میں ان کے لیے اللہ اور اس کے رسول کو چھوڑ کر آیا ہوں، تب میں نے (دل میں) کہا: میں آپ سے کبھی بھی کسی معاملے میں نہیں بڑھ سکوں گا۔
(سن ابی داؤد: کتاب الزکوٰۃ، حدیث نمبر 1678)
یہ بات درست ہے کہ رسول اللہ ﷺ نے سارا مال اللہ کی راہ میں دینے سے منع فرمایا ہے، تاکہ انسان تنگ دستی اور محتاجی کا شکار نہ ہو اور بعد میں ندامت محسوس نہ کرے۔ تاہم، حضرت ابوبکر صدیق رضی اللہ عنہ کا معاملہ اس سے مختلف تھا۔
حضرت ابوبکر رضی اللہ عنہ کا ایمان، اللہ پر توکل اور ایثار بے مثال تھا۔ جب انہوں نے اپنی پوری دولت راہِ خدا میں پیش کی، تو آپ ﷺ نے ان سے پوچھا کہ ابو بکر! اپنے گھر والوں کے لیے کیا چھوڑا ؟ تو انہوں نے جواب دیا کہ میں نے ان کے لیے اللہ اور اس کے رسول کو چھوڑا ہے۔
رمضان اسپیشل: شاندار کرسپی چلی بیف بنانے کی ترکیب
یہ اس بات کی دلیل ہے کہ وہ کسی طرح کی مفلسی یا پریشانی سے خوفزدہ نہ تھے، بلکہ ان کا مکمل بھروسا اللہ پر تھا۔ اس لیے ایسے افراد جو اس درجے کے یقین اور توکل کے حامل ہوں، ان کے لیے اپنا سب کچھ اللہ کی راہ میں دینا باعثِ خیر و برکت ہوتا ہے، جیسا کہ حضرت ابوبکر رضی اللہ عنہ کے معاملے میں ہوا۔
جبکہ عام انسانوں کے لیے نبی کریم ﷺ نے ایک متوازن راستہ اختیار کرنے کی ہدایت دی، تاکہ وہ خود اور ان کے اہلِ خانہ معاشی تنگی کا شکار نہ ہوں۔ یہی وجہ ہے کہ دین میں اعتدال اور میانہ روی کی تعلیم دی گئی ہے، تاکہ انسان نیکی کے کاموں میں آگے بڑھتے ہوئے اپنی ضروریات اور ذمہ داریوں کو بھی نظرانداز نہ کرے۔
