اسلام آباد، مشیر قانون و انصاف بیرسٹر عقیل ملک کا کہنا ہے کہ اوورسیز پاکستانیوں نے بانی پی ٹی آئی و سابق وزیراعظم عمران خان کی سول نافرمانی کال پر دو ٹوک انداز میں’’ایبسلوٹلی ناٹ‘‘ کہہ دیا ہے۔
بیرسٹر عقیل ملک نے کہا کہ اوورسیز پاکستانیوں نے جنوری 2025 میں 3 ارب ڈالر بھیجے، انہوں نے ثابت کیا کہ وہ ریاست کے ساتھ ہیں، نہ کہ انتشاری سیاست کے پجاریوں کے ساتھ ۔
بیرسٹر عقیل ملک کا کہنا ہے کہ اوورسیز پاکستانی معیشت کی ریڑھ کی ہڈی اور پاکستان کی ترقی کے ضامن ہیں۔
مشیر قانون و انصاف نے کہا کہ اوورسیز پاکستانیوں نے 2025 کے پہلے سات ماہ میں 31.7 فیصد اضافے سے 20.8 ارب ڈالر بھیجے، انہوں نے واضح کر دیا کہ ان کے دل پاکستان کیلئے دھڑکتے ہیں، نہ کہ معیشت دشمنوں کیلئے، اوورسیز ہمارا فخر اور پاکستان کی پہچان ہیں۔
دوسری جانب وزیراعظم شہباز شریف کی جانب سے لیبیا کشتی حادثے کی متعلقہ حکام سے رپورٹ طلب کر لی گئی۔
وزیراعظم شہباز شریف کی جانب سے لیبیا کے ساحل پر کشتی کے حادثے اور اس میں جاں بحق ہونیوالے پاکستانیوں کیلئے گہرے دکھ اور افسوس کا اظہار کیا جبکہ جاں بحق ہونے والے افراد کے لواحقین سے اظہار تعزیت کیا۔
