نوسانترا، انڈونیشیا کی حکومت نے اپنی سرزمین پر آئی فون 16 سیریز اور ایپل واچ 10 سیریز کی فروخت اور استعمال پر پابندی عائد کر دی ہے۔
انڈونیشیا کی حکومت نے اپنی سرزمین پر آئی فون 16 سیریز اور ایپل واچ 10 سیریز کی فروخت اور استعمال پر پابندی عائد کر دی ہے، جس کی وجہ ایپل کی جانب سے انڈونیشیا میں سرمایہ کاری کے وعدوں کی عدم تکمیل بتائی گئی ہے۔ ایپل نے انڈونیشیا میں ریسرچ اینڈ ڈویلپمنٹ مراکز کے لیے 10 کروڑ ڈالرز سے زائد کی سرمایہ کاری کا وعدہ کیا تھا، مگر اب تک کمپنی نے صرف ساڑھے 9 کروڑ ڈالرز کی سرمایہ کاری کی ہے۔
اس کے نتیجے میں انڈونیشیا کی وزارت صنعت نے ایپل ڈیوائسز کے آئی ایم ای آئی سرٹیفکیٹس کے اجرا کو بلاک کر دیا ہے، جس کی وجہ سے ملک میں ان ڈیوائسز کی فروخت اور رجسٹریشن ممکن نہیں رہی۔ انڈونیشین خبر رساں ادارے کے مطابق، غیر ملکی سیاحوں اور فضائی کمپنیوں کے عملے کو ان ڈیوائسز کو استعمال کرنے کی محدود اجازت ہوگی، لیکن وہ انہیں فروخت نہیں کر سکیں گے۔
انڈونیشین قوانین کے مطابق، غیر ملکی کمپنیوں کو ملک میں کام کرنے کے لیے 40 فیصد مقامی مواد فراہم کرنے کی ضرورت ہوتی ہے، جس کے لیے مقامی سطح پر اشیا کی تیاری، سافٹ وئیر ڈیولپمنٹ، یا ریسرچ اینڈ ڈویلپمنٹ سینٹرز کا قیام ضروری ہے۔
ایپل کی جانب سے ان شرائط کی تکمیل نہ ہونے کے باعث حکومت نے یہ اقدام اٹھایا ہے۔
