کراچی، پولیس نے گلشن اقبال بلاک 4 میں کارروائی کرتے ہوئے شارٹ ٹرم اغواء کی وارداتوں میں ملوث جعلی پولیس افسر اور اہلکار کو گرفتار کر لیا، گرفتار ملزمان میں بلاول خلجی اور وقاص شامل ہیں۔
پولیس حکام کے مطابق ملزمان کے قبضے سے جعلی بلٹ پروف جیکٹ، موبائل فون اور ہتھکڑیاں برآمد کی گئیں۔ ملزمان نے سول ایوی ایشن کے ملازم، پولیس اہلکار اور صحافی کو اغواء کیا تھا۔
ملزمان غیر اخلاقی ویب سائٹس پر دوستی کرکے اغواء کی وارداتیں کرتے تھے، گرفتار ملزمان کے موبائل فون سے مغویوں کی ہتھکڑی لگی ویڈیوز بھی ملی ہیں۔
پولیس کے مطابق اغواء شدہ افراد کو کئی گھنٹوں تک گاڑی میں گھمانے کے بعد ان کے اے ٹی ایم کارڈز بھی خالی کر دیے جاتے تھے،ملزمان کے قبضے سے 2 پستول، 20 بیگ پولیس یونیفارم، درجنوں بیجز، متعدد گھڑیاں اور جدید ایل سی ڈی بھی برآمد ہوئی ہیں۔
پولیس کا کہنا ہے کہ گروہ کے سرغنہ بلاول خلجی کا تعلق رحیم یار خان سے ہے، جبکہ وہ کراچی کے گلشن علاقے کا رہائشی ہے، بلاول خلجی کے خلاف رحیم یار خان اور کراچی میں 5 مقدمات درج ہیں،گرفتار ملزمان سے مزید تفتیش جاری ہے۔
