تہران، ایران کی جانب سے اسرائیل کو حالیہ حملے کا جواب دینے کے لیے تمام دستیاب وسائل استعمال کرنے کا اعلان کیا گیا ہے۔
غیر ملکی میڈیا کا کہنا ہے کہ ترجمان ایرانی وزارت خارجہ اسماعیل بقائی نے اپنے ایک بیان میں یہ کہا کہ صیہونی حکومت کو یقینی اور مؤثر جواب دینے کے لیے تمام دستیاب وسائل کو بروئے کار لایا جائے گا۔
اسماعیل بقائی نے کہا کہ ہمارے ردعمل کی نوعیت اسرائیلی حملے کی نوعیت پر منحصر ہے۔
یاد رہے کہ اسرائیل کی جانب سے گزشتہ دنوں ایرانی فوجی مقامات پر فضائی حملہ کیا گیا تھا جس میں 4 ایرانی فوجی جاں بحق ہوئے تھے۔
گزشتہ روز ایرانی سپریم لیڈر کی جانب سے بھی اپنے ایک بیان میں یہ کہا گیا کہ صیہونی ایران سے متعلق غلط اندازہ لگا رہے ہیں اور وہ اب تک ایرانی عوام کی طاقت اور عزم کو نہیں سمجھ سکے، ہمیں انہیں سمجھانے کی ضرورت ہے۔
دوسری جانب، اسرائیلی وزیراعظم کا کہنا ہے کہ ایران پر اسرائیل کا ہوائی حملہ درست اور طاقتور تھا اور اس حملے نے اپنے تمام مقاصد حاصل کر لئے۔
نیتن یاہو کا کہنا تھا کہ ایران نے سینکڑوں بیلسٹک میزائلوں سے اسرائیل پر حملہ کیا اور یہ ناکام ہو گیا، ہم نے اپنا وعدہ پورا کیا، فضائیہ کی جانب سے ایران پر حملہ کیا گیا اور ایران کی دفاعی صلاحیتوں اور میزائلوں کی پیداوار کو نشانہ بنایا۔
