امریکا کے سب سے بڑے اور بااثر شہر نیویارک میں ایک تاریخی لمحہ اس وقت دیکھنے میں آیا جب 34 سالہ ظہران ممدانی نے باضابطہ طور پر میئر کے عہدے کا حلف اٹھا لیا۔
اس طرح وہ نہ صرف نیویارک کے پہلے مسلمان میئر بن گئے بلکہ گزشتہ ایک صدی میں اس منصب پر فائز ہونے والے سب سے کم عمر میئر کا اعزاز بھی حاصل کر لیا۔ ان کی حلف برداری کی تقریب سٹی ہال میں منعقد ہوئی جس میں سیاسی، سماجی اور عوامی حلقوں کی بڑی تعداد نے شرکت کی۔
تقریب کے دوران ظہران ممدانی نے قرآن پاک پر ہاتھ رکھ کر حلف لیا۔ خاص بات یہ تھی کہ انہوں نے حلف برداری کے لیے اپنے دادا اور دادی کا قرآن پاک استعمال کیا، جسے شرکاء نے ان کی خاندانی اقدار اور مذہبی وابستگی کی خوبصورت علامت قرار دیا۔ اس موقع پر معروف امریکی سیاست دان اور رکنِ کانگریس برنی سینڈرز بھی موجود تھے، جنہوں نے قرآن پاک پر حلف لینے کے عمل کی تائید اور احترام کیا۔
نیو یارک کے پہلے مسلمان میئر ظہران ممدانی نے قرآن پاک پر عہدے کا حلف اٹھا لیا
حلف اٹھانے کے بعد اپنے پہلے خطاب میں میئر ظہران ممدانی نے کہا کہ آج سے نیویارک میں ایک نئے دور کا آغاز ہو رہا ہے۔ انہوں نے واضح کیا کہ وہ بلا تفریق رنگ، نسل، مذہب یا پس منظر، تمام نیویارک کے شہریوں کے میئر ہیں۔ ان کا کہنا تھا کہ نیویارک کی طاقت اس کے تنوع میں ہے اور وہ اسی تنوع کو اپنی قیادت کی بنیاد بنائیں گے۔
ظہران ممدانی نے خطاب میں اس عزم کا اظہار کیا کہ وہ شہریوں کے حقوق کے تحفظ کے لیے ہر ممکن جدوجہد کریں گے۔ ان کا کہنا تھا کہ میئر کا منصب ان کے لیے صرف ایک عہدہ نہیں بلکہ ایک بڑی ذمہ داری ہے۔ انہوں نے وعدہ کیا کہ شہر کو درپیش مسائل، جن میں مہنگائی، رہائش، صحت اور عوامی تحفظ شامل ہیں، ان کے حل کے لیے عملی اقدامات کیے جائیں گے۔
انہوں نے مزید کہا کہ وہ ہر مشکل گھڑی میں نیویارک کے عوام کے ساتھ کھڑے رہیں گے اور ایک ایسا شہر بنانے کی کوشش کریں گے جہاں ہر فرد خود کو محفوظ، بااختیار اور برابر کا شہری محسوس کرے۔
حلف برداری کے بعد ظہران ممدانی کی میئر شپ کے آغاز کی خوشی میں ایک خصوصی عوامی تقریب بھی منعقد کی گئی، جس میں شہریوں کی بڑی تعداد نے شرکت کی۔ عوام نے جوش و خروش کے ساتھ نئے میئر کا استقبال کیا اور اسے نیویارک کی تاریخ میں ایک اہم اور مثبت تبدیلی قرار دیا۔
